WILLEMSTAD.- E sektor di Farándula ta den un krísis i mester sali for dje situashon ku nan ta den. Awe mainta miembronan di un komishon ku a keda lantá di personanan ku ta direktamente enbolbí ku farándula lokal lo reuní ku Minister Steven Martina.

Minister Martina ku tin e kartera di Ekonomia ta e persona indiká pa e komishon dje sektor hiba kombersashon kuné.

Ayera nochi ‘DEN E BEMBE’ a kombersá ku parlamentario sr. Gilbert ‘Gibi’ Doran kende a indiká ku Gobièrnu mester saka man yuda e sektor di farándula ku ta sufriendo pisa debí na medidanan ku ta tumando e último lunanan.

‘Tin hopi hende ku ta biba for di farándula, no solamente músikonan ku aworakí ta forma parti di e 40% di pueblo di Kòrsou ku ta sin trabou. E sistema ku ta dal e sektor aki sera pa loko a hinka i ta hinkando hopi den problema’, asina sr. Doran a kuminsá splika.

Mas aleu el a indiká ku mester por habri bou di sierto reglanan. Sr. Doran ta spera ku e kombersashonnan kana bon awe i ku lo por tin un apertura pa farándula. E ta konsiente ku mester hasi esaki ku kondishon i e ta kere sigur ku e públiko lo mantené su mes na reglanan ku keda imponé.

Músikonan ta pidi pa duna nan e oportunidat pa presentá òf lo mester yega na un fórmula ku lo duna músikonan establesé un supsidio pa motibu ku tin henter e sektor di farándula paralisá.

E komishon tin diferente senario pa presentá awe durante dje reunion kaminda nan ta spera di por risibí un apertura pa habri e sektor di farándula bèk.

 

LAGA UN KOMENTARIO

Please enter your comment!
Please enter your name here