WILLEMSTAD.- Despues ku dia 30 di yüli último a duna inisio na selebrashon di 30 aña ‘Primintími’ den Hòfi Popo Rojer na Barber, esaki ta sigui, pero e biaha aki na Palapa Papito na Banda Riba.
Manera grandinan sa bisa: Primintí ta Debe! Wèl e fecha ta konosí. Dia 8 di òktober awor, Karimbo i Wini Poulo lo ta na Banda Riba pa ser eksakto den Palapa Papito, kuminsando for di 4’or di atardi pa 10’or di anochi.
Manera ta konosí, e aña aki e kansion ‘Primintími’ ta kumpli 30 aña di eksistensia i hustamente den e aña di selebrashon aki, ta organisando vários aktividat, kaminda ta para ketu na e piesa aki.
HISTORIA DI PRIMINTIMI
‘Primintími’ a nanse bou di un palu di mansaliña na Watamula na Westpunt. Aki e inspirashon a drenta i ku un guitara a traha e piesa. E mesun anochi ei tabatin un ensayo di e banda La Clave i tabata e promé biaha ku nan a pasa ‘Primintími’.
Pa loke ta trata e melodianan di tròmpèt, esakinan tabata un idea di Mauchi Alberto ku a inventá e melodianan di brass den e piesa. Mauchi Alberto mes a yama esaki un “kinderwijsje”. Huntu ku Wotty Ricardo nan tabata e promé nan ku a toka tròmpèt den e piesa aki. Ta bon pa ilustrá ku ningun di dos no tabata por a lesa músika.
E promé biaha ku e piesa aki a zona na un fiesta tabata e siguiente djasabra na kas di famia Pisas na Banda Bou. E reakshon tabata tremendo.
ENTRADA PORNADA
Meskos ku tabata e kaso di dia 30 di yüli na Popo Rojer, e entrada pa loke ta trata e biaha aki tambe lo ta pòrnada, esta grátis. E kombinashon musikal lo ta di Karimbo i ‘Café con Son’ di Wendell Martis.
Bar i kushina lo ta na preis chikí. Kushina ta den man di e famoso kòki di Banda Bou.
Abo ta keda kordialmente invitá pa e biaha aki na Banda Riba, ban sigui selebrá 30 aña ‘Primintími’.
