WILLEMSTAD. – Dia 23 di yüni, nos kon siudadano, sr. Hermelio Curiel a kumpli e edat respetá di 100 aña. Si bo bisa Hermelio Curiel, kasi sigur hopi hende no ta konosé, pero na momentu ku bo bisa Mimi Curiel, tur hende sa di ken bo ta papia.
Mimi Curiel a traha pa hopi aña na e kompania di Shell Nederlandse Antillen verkoopmaatschappij abreviá SNAV kaminda e tabata okupá un funshon hopi haltu, kaminda e tabata e persona di kontakto ku tur e pòmp di gasolinnan na Kòrsou. Snav tabata un kompania di Shell i despues ku Shell a bandoná Kòrsou, Curoil a bini na lugá di Snav.
Klaro ku su dos yu’i nan i su nietu no kier a laga e fecha tan importante aki di nan tata i abuelo pasa i ta pa e motibu ei, djasabra último, tabatin un agasaho hopi bunita pa Mimi na Terasa Mongui Maduro Library, kaminda tur famia, bon konosí di Mimi i su eks koleganan por a bini huntu pa selebrá di un manera ameno Mimi su 100 aña.
E bunita di Mimi ta ku e ta un persona ku apesar di su 100 aña ta kòrda TUR kos i tur dia ta lesa su korant pa tene su mes na altura di tur lokual ta pasando. Mimi tin un mente hopi skèrpi i bon i te ainda por bedei bo eksaktamente sierto kosnan di pasado. Durante di e agasaho, un persona ku a papia a bisa ku Mimi ku, mirando su estado perfekto di salú, e ta kere ku Mimi lo tin hopi chèns di yega 110 aña. Mimi humilde manera e ta a bisa ku si ta boluntat di Dios, esei sigur e ke alkansá. Si esaki sosodé, lo ta un rekòr ku ningun hende na Kòrsou lo tin riba nan nòmber.
Su yunan i nieto a sòru pa un grupo di baile, un mariachi i un DJ ku a animá henter e selebrashon di un manera estupendo. Si bo a wak kon Mimi tabata gosa di e Mariachi, ta algu ku sigur tur hende a atmirá. Mimi tabata hisa man na laira i tabata kanta manera un hobensito.
Apesar ku den bida Mimi a pasa den momentunan difísil dor di pèrdida di un yu muhé i su sra esposa, Mimi a haña e forsa pa surpasá esakinan i sigui adelante.
Promé ku e aktividat a kuminsá nos diakono, Chonki Delanooy a hasi un orashon ku Mimi i a dun’e bendishon spesial pa su 100 aña.
Mimi un biaha mas masha pabien i ohalá, nos Kreador kumpli ku bo deseo pa bo yega 110 aña.
Tur kos bon Mimi i sigui gosa di bo bida na bo manera. Bo tin dos yu i un nieto ku ta sumamente orguyoso di nan tata i abuelo.
E potrètnan ta papia pa nan mes
Skibí pa Anthony Haile
 Curiel){kind=link}