WILLEMSTAD.- Djárason, 23 di aprel 2025, Scouting Antiano a selebrá ku orguyo i dedikashon Dia di San Jorge, patrono di Scouting Mundial. E selebrashon a tuma lugá den kurason di nos siudat, kuminsando na Plasa Jojo Correa, pasa via Fòrti, i finalisá na Plasa Wilhelmina.
Scouting Antiano ta un organisashon uniformá ku ta miembronan aktivo di WOSM – World Organization of the Scout Movement. Tur aña, riba 23 di aprel, skout rònt mundu ta selebrá e dia aki den honor di San Jorge, un figura legendario simbolisando kurashi, entrega i sakrifisio pa un mihó mañan.
Durante di e selebrashon, Scouting Antiano a rekonosé Ronald Mc Donald House of Charity komo un di e instansianan ku ta lucha pa mantené famia huntu den e proseso di rekuperashon di nan yu.
Tambe tabatin instalashon di Vaandrig Jessica Ignacio komo Komisario di Distrikto pa Distrikto 2.
Banda di esaki Akela Shirley Kopra a risibí e Oorkonde di Troepiaal in Goud pa tur loke ku el a hasi pa Scouting Antiano.
Segun e leyenda, San Jorge tabata un sòldá balente ku a bringa kontra un dragon peligroso pa salba un pueblo ku tabata sufri hopi. E dragon tabata eksigí sakrifisio humano, i un dia, meskos e prinsesa di e rei a wòrdu skohé pa ser sakrifiká. San Jorge a yega na e momentu krítiko i a enfrentá e dragon den un bataya intensivo. Al final, ku determinashon i balentia, San Jorge a vense e dragon, i na e lugá kaminda su sanger a kai, un rosa a nase.
Esaki ta e rason pa kual Scouting ta usa e símbolo di rosa den e selebrashon aki, i komo parti di e seremonia, e rosanan ta wòrdu kimá den un baki di kandela. Esaki ta simbolisá e deseo pa kita tur kos malu – nos ‘dragonnan’ – pa hasi kaminda pa pas, amor i un komunidat mihó.
E selebrashon di e aña aki tabata un eksperensia inolvidabel. Skout, mayornan, famia i turistanan ku tabata presente, por a biba e historia pa medio di un aktuashon vibrante, prepará i presentá pa nos mes scoutnan.
Scouting Antiano ta sigui inspirá i yuda nos hubentut krea un futuro positivamente. Dia di San Jorge ta un momento di refleho i renobashon, pa sigui lucha kontra opstákulo ku balentia i determinashon – manera San Jorge mes a hasi.
Por sigui nos riba facebook di Scouting Antiano o nos wèpsait www.scoutingantiano.org i si abo o bo tin un famia sea si ta chikí o grandi, for di 5 aña bai ariba, ku ta interesá pa forma parti di nos organisashon, por yama na JCC na +5999 5118322 pa informashon di gruponan rònt Kòrsou. SCOUTING ANTIANO THE SCOUT ASSOCIATION OF CURAÇAO Kaya Wladimir R.R. “Coco” Balentien 41 Curacao www.scoutingantiano.org info@scoutingantiano.org +599 9 737 4765
