WILLEMSTAD.- E selekshon di futbol di Kòrsou a sali rumbo pa e siudat Melbourne pa enfrentá Oustralia den e di dos i último partido di e FIFA Series 2026. Ayera Kòrsou a kai 2-0 kontra di China den Accor Stadium, Olympic Park. Despues di e partido aki, e tékniko Fred Rutten, huntu ku e kapitan Leadro Bacuna a hasi presensia na un rueda di prensa pa komentá riba e partido tras di lomba.
Rutten a trese dilanti ku tabata su promé bista di e hungadónan durante un partido ofisial. Tin hopi detaye ku el a mira riba kua mester sigui traha. Pero futbòl ta eksistí dor di momentu i den e wega ta tin dos momentu ku a pone Kòrsou pèrdè e wega, segun el a splika. “Di kada wega bo ta siña un lès”, segun e entrenadó nashonal, ku bisa ku “no mester lubidá ku nos ta den e proseso di preparashon pa un mundial”.
Kapitan Leandro Bacuna no ta mira motibu pa tin pániko. “Mester saka e kosnan positivo for di e resultado i konstruí ribanan pa sigui pa dilanti”. Bacuna ta haña ku China no a dominá e partido sino a usa dos oportunidat ku nan a haña pa por a logra e viktoria.
Selekshon di Kòrsou awe ta biaha pa Melbourne pa sigui prepará pa e segundo partido di e FIFA Series 2026 ku lo tuma lugá djamars 31 di mart pa 5’or di mardugá (ora di Kòrsou) kontra di e pais anfitrión, Oustralia.
