Senador demokrat, Chuck Schumer, kende a demostrá kushi pa atvertí pa “diktadura di Donald Trump”.
WASHINGTON (AFP).- E prinsipal senador demokrat di Merka ayera a atvertí ku e petishon di presidente Donald Trump na Departamento di Hustisia pa tuma medida kontra di su atversarionan ta hiba e pais riba kaminda pa un diktadura. “Konbertí e departamento den un instrumènt pa persiguí su enemigunan, sea kulpabel òf no… ta kaminda pa un diktadura”, segun e lider di minoria di Senador, Chuck Schumer, na CNN.
“Esei ta loke ku diktaduranan ta hasi”, segun el a enfatisá. Trump djasabra último públikamente a hasi un yamada riba Departamento di Hustisia pa tuma akshonnan kontra di su supuesto enemigunan, e último di un seri di medidanan ku, segun krítikonan, a destrosá e independensia tradishonal di e ministerio.
Den un publikashon riba páginanan sosial dirigí na “Pam”, aparentemente e fiskal general Pam Bondi, Trump a ekspresá su frustrashon pa e falta di akshonnan legal kontra e senador di California Adam Schiff i e fiskal general di New York, Letitia James, tur dos demokratnan. Schiff i James ta keda señalá pa un aliado hopi serka di Trump, e direktor di agensia Federal di Finansiamentu di Bibienda, Bill Pulte, di a falsifiká dokumentonan den solisitutnan pa hipotek.
“Nos no por tarda mas, nan ta dañando nos reputashon i kredibilidat”, segun Trump a deklará.
Djabièrnè último e mandatario a duna retiro na e fiskal federal, Erik Siebert, ku tabata supervisá e investigashon riba James, despues ku, segun informenan, esaki a insistí ku no tin sufisiente prueba pa akusá James di froude hipotekario.
“M’a dun’é retiro, i tin un kaso grandi, i hopi abogado i eksperto legal ta bisa esei”, segun Trump a deklará djasabra, aparentemente refiriendo na e investigashon riba James. Schiff i James den añanan tras di lomba di forma separá a enfrentá Trump, na kabes di investigashonnan ku e presidente republikano a bisa ku tabata un yagmentu polítiko riba su persona.
