WASHINGTON, MERKA, AFP.- E lider demókrata di Senado, Chuck Schumer a urgi presidente Joe Biden pa e stòp di deportá migrantenan haitiano. Kas Blanku a wòrdu kritiká pa e forma kon ta atendiendo ku e inmigrashon i pa supuesto abusu di e refugiadonan.
Agentenan ku ta patruyá na frontera ta luchando pa kontené e entrada masivo di migrantenan no dokumentá. Míles di e migrantenan aki ta di Haiti.
Duana a bisa ku lo saka “mayoria” usando ‘Title 42’, un polítika di gobièrnu di Donald Trump ku ta stòp mayoria yegada na sùit di frontera basá riba e echo ku nan por kontribuí na plamamentu di COVID.
Washington a kuminsá manda avionnan yen di siudadano haitiano bèk pa nan pais, kual ta pasando den un krísis polítiko aktualmente.
E krísis a empeorá despues ku imágennan di e fotógrafo Paul Ratje a plama riba medionan sosial, kaminda por mira agentenan riba kabai ta zuai ku kabuya pa menasá e migrantenan.
Alejandro Mayorkas, sekretario di Departamento di Seguridat Nashonal a bisa ku e ofisialnan riba e imágennan tabata purbando di manehá e fluho di sentenáres di migrante ku a purba krusa di Rio Grande for di México, serka di Del Rio, Texas.
