WILLEMSTAD/ROTTERDAM.- E kaso kontra di e hóben yu’i Kòrsou Sendric S. (24) ku a asesiná tres hòmber na Rotterdam ta bai kuminsá. Apesar di esaki, aparentemente te ainda e lo no a bisa e motibu dikon el a kometé e echonan aki. Loke ku si a bin dilanti ta ku un korto tempu promé ku el a kometé e promé asesinato djasabra anochi 21 di desèmber 2024, el a kumpra un arma di kandela. Riba tur e tres hòmbernan el a tira nan di parti patras. Un di nan el a pone e arma patras di kabes di e hòmber grandi aki, i a los e tiru mortal. Tres hòmber di respektivamente 63, 58 i 81 aña a fayesé ora ku e akusado a tira nan mata. Dos di nan a keda tirá den kabes. E tiroteonan a tuma lugá fin di desèmber i kuminsamentu di yanüari. Durante di detenshon di Sendric S. den balkon di un kas na Emelissedijk un bario den IJsselmonde, outoridatnan a konfiská un arma di kandela ku a hasi investigashon riba dje. For di yanüari di e aña aki ku outoridatnan a detené Sendric S., wes komisario a ordená su enkarselashon pa 90 dia den e Sentro Pieter Baan. E mester a bai e sentro aki pa tantu sikólogo komo sikiater hasi investigashon di su personalidat, i traha un rapòrt kual ta masha esensial pa fiskal i wes yega na respektivamente demanda i kondena pa Sendric. Aparte di Sendric tin dos hòmber mas detené p’e kaso aki. Un di nan ta un hóben di 17 aña. No a duna nashonalidat di e hóben di apénas 17 aña aki. E hóben di Assen, i ta keda sospechá di ta envolví den e kasonan di tiroteo fatal. Tambe tin un hòmber mas di 20 aña di Amsterdam den e kaso aki detené. Tur kos ta kla pa Sendric su kaso keda trata den korte di Rotterdam.
