DAKAR (AFP).- Na klousura dje kampaña elektoral na Senegal, e ganadó i presidente nobo, Bassirou Diomaye Faye, a subi esenario ku mannan tené di su dos kasánan, un gesto sin presedente den e pais afrikano aki.
Faye, un opositor ku a hasi kampaña ku e promesa di un kambio radikal i un polítika panafrikano, ker a manda un mensahe den un pais di mayoria musulman kaminda poligamia ta un práktika tradishonal i religioso aseptá pa un mayoria.
E promé dama dje presidente eligí, Marie Khone, ta bini di e mesun pueblo ku Faye i nan a kasa 15 aña pasá i tin kuater yu. E polítiko a selebrá su di dos boda ku Absa un aña pasá.
“Esaki ta un konsagrashon dje tradishon di poligamia na e nivel mas haltu di estado, un situashon ku ta reflehá e tradishon senegales”, segun e sosiólogo Djiby Diakhate.
Poligamia ta un tema ku ta generá kontroversia i e aparishon di Faye ku su dos kasánan, aploudí pa un multitut, tabata den sentro di e debatenan den medionan, riba internèt i den kasnan di famia, generando reakshonnan diferente.
“Pa mi persona, e echo di ta e di dos kasá ta mihó ku ser e promé, segun e kantante Mia Guisse a bisa ku orguyo riba un video ku a bai viral.
“Awor e posibilidat aki ta kompetí kontra di matrimonio homoseksual”, segun e sosiólogo Fatou Sow Sarr, i esaki den un pais kaminda ku homoseksualidat ta keda kastigá ku entre un pa sinku aña di prisòn. “Mi ta kere ku Oksidente no tin derechi pa husga nos kulturanan”, segun el a agregá.
Pero hopi muhé den Senegal ta kontra dje práktika, ku nan ta kalifiká di ta hipókrita i inhustu, i un informe di Komité di derechinan Humano di Nashonnan Uní a indiká ku e ta kontribuí na diskriminashon dje hende muhé.
