Korte a ordená Moses (MP) i no otro parlamentarionan pa forma kuorem

WILLEMSTAD.-Korte a dikta sentensia awe djamars 11 di ougùstùs 2020 na lugá di djarason 12 di ougùstùs manera a indiká djabièrnè último despues di tratamentu di e kaso di Shaheen Elhage. Durante tratamentu di e kaso djabièrnè último Elhage a pidi korte pa hasi posibel ku e por huramentá i asina kumpli ku su derecho komo miembro di Parlamento. Promé ku esei na tres okashon a yama reunion di Parlamento pero 10 miembronan di oposishon no kier a forma kuorem pa asina por trata kredensialnan di Elhage.

Elhage komo esun perhudiká a yama tur 20 miembro di Parlamento den korte. Manera ta konosí e eks presidente di Parlamento Junior Millerson a fayesé i Marilyn Alcala-Walle su kredensialnan tabata kla i aprobá, pero e no a bai huramentá serka gobernador. Despues el a desde ku e no ta drenta Parlamento mas. E siguiente riba lista ta Shaheen Elhage, pero for di einan no a logra forma kuorem mas den Parlamento. Kada bia e 10 miembronan di oposishon tabata bini ku otro motibunan di kon no ta sostené pa habri e reunion di manera ku por trata kredensialnan di Elhage.

Su ekselensia gobernador Lucille George-Wout tambe a skucha lidernan di frakshon tratando na kibra e impase, pero no a logra. Parlamentario Marilyn Moses di Movementu Progresivo ta esun ku for di un prinsipio a bisa ku e no tin problema pa sostené entrada di e miembro nobo pero e ke haña klaridat riba e punto si tin vakatura òf no. Den tratamentu di e kaso wes a para ketu na e punto ei.

Den e veredikto korte ta mustra ku ta trata aki di un asuntu di urgensia na interes di pais. Mester indiká sinembargo ku korte ta haña ku Shaheen Elhage no ta atmisibel den e kaso aki kontra e miembronan i presidente di Parlamento.

E motibu dikon a ordená Marilyn Moses i no otronan ta segun korte debí ku sra. Moses a indiká ku no ta korte mester atendé ku e asuntu aki i ku ta den Staten ta e lugá pa diskutí e tema pa un miembro huramentá si òf no. Tambe Moses ta haña ku e periodo di 4 siman no a pasa despues ku Alcala-Walle a ninga e puesto. Moses a eksigí veredikto di korte.

Den e desishon korte ta haña ku demanda kontra pais Kòrsou i Parlamento di Kòrsou no ta na su lugá i p’esei ta rechasá esaki. Korte ta ordená Marilyn Moses si pa duna su koperashon na e promé reunion di Parlamento ku keda yamá pa asina por permití e miembro nobo di drenta Parlamento. Mester ehekutá e desishon mesora. Kada partido ta kubri su propio gastunan. Detayenan kompletu di e veredikto den edishon di EXTRA.

 

Sentensia: Korte a ordená Moses pa bai Parlamento pa forma 11

WILLEMSTAD.- Den un veredikto sorprendente, debí ku tur hende ta spera veredikto di korte te mañan djarason, korte a dikta un sentensia den e kaso ku Shaheen Elhage a entamá kontra pais, gobièrnu i hinter Parlamento. Den e sentensia wes ta ordená Marilyn Moses pa asistí na e promé reunion di Parlamento, duna su koperashon di manera ku e tratamentu di kredensialnan por tuma lugá pa asina e miembro nobo por drenta Parlamento. Mas detaye un djis.

LAGA UN KOMENTARIO

Please enter your comment!
Please enter your name here