WASHINGTON(AFP).- Un kantidat grandi di sindikatonan merikano a disidí di duna konseho di voto i kampañá pa e kandidato presidensial Joe Biden e siman aki. Nan a duna di konosé ku Presidente Donald Trump ta laga trahadónan na kaya i ku e tabata hopi negligente den e manera kon el a atendé ku e pandemia di COVID-19.
“Nos konose Joe, i Joe konosé nos”, asina e presidente di e sentral sindikal AFL-CIO, Richard Trumka a duna di konosé na nòmber di e 12.5 mion miembronan i 55 sindikatonan ku ta afiliá na e grupo aki.
E èks vise presidente merikano a sostené e gruponan aki pa yuda mehorá kondishonnan di trabou pa trahadónan merikano, esei di akuerdo ku Trumka. E konseho di voto aki ta djis un forma di sosten pa Biden, kende Trumka a deskribí komo un hòmber di palabra i un kampion den asuntunan di salú, salarionan, derechonan sivil i e abilidat pa forma i djòin un sindikato.
“Tambe esaki ta un rechaso kla di e trayektoria ku ta kanando aktualmente”, segun Trumka. “Donald Trump a kampañá komo un amigu dje trahadó” i a sa di saka votonan for di e merikano dje klase trahadó ku tabata desesperá dje konsepto di hasi negoshi manera semper, segun Trumka. Pero durante e último tres añanan e presidente a demonstrá su kolónan berdadero, kòrtando den reglanan pa protehá trahadónan, kortando den e kantidat di inspektornan di seguridat i mina e sistema di akuerdonan kolektivo.
“Su manera di atendé ku COVID tabata negligente, ku tardansa, desorganisá i mortal”, segun Trumka, agregando ku Trump a trese kuné e temor di mas haltu serka Merikanonan. “Esaki lo ta nos eskoho de aña aki, di skohe entre e negativismo di Trump òf Biden ku ta representá bondat”.
