Daviënne Bislip
Miss Teen Curaçao 2020

 

Daviënne Bislip ta Miss Teen Curaçao 2020. Un damita ku nunka a pensa ku e lo ta riba pasarela komo miss. Na 2018 su trayektoria a kuminsá ora el a keda aserka pa representá Kòrsou na Miss Teen Turismo. Esaki pa Daviënne tabata un sorpresa. Manera e mes a bisa Djasabra nunka el a pensa ku un persona tímido manera e lo a yega asina leu. El a gana Miss Teen Branding, tambe Miss Elegansia i mihó trahe i a bai ku e premio máksimo ku ta esun di Miss Turismo. Daviënne a keda hopi kontentu ku su mes. “Mi tabata hopi tímido. Mi no kier a ni subi stage e anochi final. Tabata un eksperensia úniko pasobra mi a siña kon bo mester ta den e mundu di beyesa. Bo mester ta tur ora representabel pasobra kòrda no ta bo nòmber ta konta pero Kòrsou”, Daviënne a konta nos.

Komo e no tabata modelá ni nada, e mester a sigui kursonan rápido entre otro di Public Speaking tambe pa ora e papia riba stage. El a hasi e sakrifisio pasobra e kier a yega leu.

 

Mi soño….

Despues tambe el a keda aserká pa e por partisipá na Miss Teen Universe. Esaki a dun’é un satisfakshon i un alegria mas grandi aun.  Daviënne su soño semper tabata pa bai pa Miss Kòrsou pero no ta algu fásil. Ta algu ku bo mester ta bon prepará pa hasi. I ora el a keda aserká pa Miss Teen Universe e no a duda. Daviënne awor aki ta bezig ku su preparashonnan pa na 2020 na yanüari e bai pa Miss Teen Universe.

 

Hasié pa bo pais…

Kualke hende ku mira Daviënne riba pasarela awor aki lo pensa ku ta un hóben ku tin basta eksperensia ku stage. Pero manera el a bisa nos di Djasabra, nunka promé el a subi pasarela. E ta kòrda ku na un okashon el a forma parti di un foro kaminda e mester a papia dilanti di un públiko i e tabata hopi nèrvioso, pero na mes momentu el a siña kon e ta relahá su mes pasobra e kier a hasié pa Kòrsou.

 

Siendo un representante pa e miss turismo, el a profundisá su mes den turismo na Kòrsou. El a bishitá hopi lugá turístiko di Kòrsou i ounke el a siña hopi e sa ku tin muchu mas pa e sera konosí kuné.

 

Mester di fondo….

Pa partisipá na e diferente sertámennan di beyesa ta eksihí sèn, i p’esei ta organisá ku regularidat aktividatnan pa e rekoudá fondo ounke tambe e ta hasi aktividatnan boluntario tambe. Esnan di rekoudá fondo ta pasobra kada un partisipashon di dje, kada trahe di nashonal i gala tur ta kosta basta plaka. I p’esei e ta rekoudá fondo. Na luna di ougùstùs e tabatin un tour ku bùs i a bishitá diferente lugá turístiko. Di e forma ei el a laga un grupo di hende sera konosí ku Kòrsou i na mes momentu e por a traha un video promoshonal i el a resultá eksitoso.

 

Aktividat ku missnan….

Daviënne kier hasi algu pa e siña for di dje i tambe otro hende. I den e kuadro ei e lo bai hasi un Evolution òf Beauty  Pageant kual ta un foro kaminda ta invitá eks miss kòrsounan i eks miss teenagernan pa nan konta di nan eksperensia. Esaki tambe lo mester yuda hóbennan ku ta kana rònt ku e gana di partisipá na un di e elekshonnan di beyesa un dia. Na mes momentu esaki lo yuda e mes ora e bai representá Kòrsou den futuro. E aktividat aki ta dia 17 di òktober.

“The Evolution of Beauty Pageants”, ta un foro kaminda nos a invitá eks Miss Kòrsou i Miss Teenagers pa bin kompartí e eksperensianan ku nan pasa aden durante preparashon, dia di e sertámen di beyesa i despues di nan partisipashon.

Kon boso ta mira e desaroyo den mundu di beyesa!!

Tambe pa nan splika si nan partisipashon na e sertámen a kontribuí positivamente den nan desaroyo personal òf karera profeshonal.

‘Esaki ta un aktividat ku na mi pareser nunka a wòrdu organisá i lo yuda den e preparashon pa mi mes personalmente i tambe e otro damanan ku tin e soño di un dia partisipá na un sertámen di beyesa’.  E aktividat lo tuma lugá djaweps 17 di òktober 2019, 19:30 pa 22:00 di anochi na Teatro Luna Blou.

E anochi lo kana di e siguiente forma:

19:00 ta habri porta
19:30 Lo duna inisio na e anochi “OPENINGSHOW”
Despues Daviënne lo keda presentá pa e moderador i lo hiba palabra.

Ta kuminsá ku e parti pa introdusí kada Miss unu pa unu, e moderador lo kompartí un
biografia kòrtiku di kada Miss, miéntras riba e ‘big screen’ e públiko por mira potrèt i
otro bunita rekuerdonan ku nan ta deseá di kompartí.
Ora tur miss, ya ta den nan asiento, Daviënne lo kuminsá hasi pregunta i kada Miss ta
haña oportunidat di konta un tiki di su mes i su eksperensia.
Daviënne lo hasi algun pregunta mas i despues lo tin oportunidat na e públiko pa hasi
pregunta.

Na final lo tin oportunidat pa “Meet & Greet”.
E idea ta pa konsientisá e hóbennan ku ta aspirá pa partisipá na un sertámen di beyesa, kiko presis e partisipashon na un sertámen ta eksaktamente, kiko ta tur e lokual nan mester ta prepará pe i tene kuenta kuné, ku NO ta tur kos ta ‘GLAMOUROUS”. Bo mester ta prepará pa tur kos, kosnan positivo i ménos positivo.

Pa nan kòrda ku ta un PAIS nan ta bai representá i mester ta dispuesto na hasi sakrifisio, bira mas tolerabel.

Pues e evento aki ta mas pa eduká hóbennan, pa nan preparashon pa partisipashon na un sertámen di beyesa. Duna nan e tepnan nesesario pa ta eksitoso.

E aktividat aki ta pa konsientisá nos hóbennan ku sertámen di beyesa no ta tur loke bo ta wak, esta tur na glitter i kònfeit, e ta mas ku ora representá un pais kòrda ku ta bo pais bo ta representá i p’esei siña kon pa defendé bo mes i tolerá sierto kosnan. Bo ta topa kosnan positivo i ménos positivo.

 

Por spera hopi….

Daviënne ta wak su mes pa ta representá Kòrsou komo Miss Kòrsou i asta Miss Universe Kòrsou. Esei segun Daviënne ta su meta final. Awor aki e ta preparando su mes pa e elekshon na Panama na luna di yanüari. El a pidi Kòrsou pa keda pendiente pasobra  e lo duna tremendo presentashon mirando e tim ku e tin su tras. E ta konsentrando den kosnan sosial, hasi trabou boluntario ku mucha i hende grandi. I den e kuadro aki tambe el a forma parti di e akshon di limpiesa di Kòrsou i a bai limpia Bramendiweg.

 

Ser bo mes….

I ora Daviënne wak e hóbennan ku ta partisipá na e elekshonnan di beyesa aki e kier a bisa nan pa nan ser semper nan mes. Esei ta loke a yuda e pa yega leu. Den su entrevistanan e ta su mes, e ta papia habrí i esei ta algu ku ta yuda bu tur ora i sigur sigur ser humilde.  Kòrda ku den elekshonnan no ta e beyesa eksterno so ta wak pero tambe beyesa interno. E persona ku no ta humilde di kurason, no ta bria manera e  lo mester bria.

 

Daviënne ta kombiná su partisipashon na elekshonnan di beyesa ku su skol. El a logra manehá esaki di tal forma ku e ta sigui prepará su mes. E ke kaba su skol pa habri su mes negoshi. I nos hóbennan por hasi uso di kòmpiuter den tempu liber pero buska kosnan informativo ku por yuda nan. No konsentrá so riba notisia di Kòrsou so pero buska pa sa afó tambe kiko ta sosodé.

LAGA UN KOMENTARIO

Please enter your comment!
Please enter your name here