WILLEMSTAD.- E diskushonnan e dianan aki riba Sandals Resort ta basta desepshonante pa esnan ku no konosé e otro banda di historia. Manera nan ta bisa, tur medaya tin dos banda sigur i loke ta pasando na Sandals tambe tin su otro banda.

EXTRA a hasi su investigashon i entre otro riba e komentario i reakshonnan di kiko turistanan ku a bishita Sandals ta pensa, e situashon ta tristu. Mayoria ta bisa ku nan lo sigui bai Sandals pero no na Kòrsou pasobra e servisio aki ta malu. I esun ku ta duna e servisio ta e trahadó.

EXTRA a purba haña kontakto ku gerensia di Sandals aki na Kòrsou pero nos a komprondé ku nan no ta reakshoná. Nan focus ta pa sigui traha pa por kumpli ku e turistanan.

E asuntu di telefòn ta un di e disgustunan serka trahadónan, ku a bin dilanti den prensa. Loke EXTRA a komprondé ta ku for di prinsipio, for di momentu ku e promé trahadó a kuminsá traha na e hotèl aki, un di e reglanan ta ku no mag di tin telefòn durante ora di trabou. Pero a tolerá i fleksibilisa e regla un poko.

Esaki a resultá un “free for all”. Mas i mas a ripara ku mester tin yen hende na trabou pero tòg trabou no ta kana. Wéspetnan ta reklamá servisio i ora a bai liga logá ta trahadónan ta skonde i papia na telefòn òf app i laga e trabou pa  algun kolega so. P’esei a tuma e desishon di hasi e medida mas fuerte i ku tur trahadó tin di pone nan telefòn den lòker. Esaki no a kai na agrado di e trahadónan i p’esei asina tantu keho kontra di e resort.

Analisando e ‘review’nan di Sandals aki na Kòrsou EXTRA por konkluí ku turistanan ta haña Kòrsou bunita, laman dushi, e hotèl ta bunita pero e servisio ta laga di deseá si kompar’é ku otro Sandals resortnan na otro islanan den Karibe. Mayoria di e turistanan ta bisa ku nan lo sigui bai Sandals pero lo no skohe Kòrsou mas.

CTB i CHATA ta hasiendo hopi esfuerso pa propagá Kòrsou internashonalmente, pa mas bishitante bin nos isla. Pero si ta esaki ta e eksperensia, ki bal! Diferente empresario riba tereno di turismo ta haña ku ta bon pa pensa kiko nos ke.

 

 

LAGA UN KOMENTARIO

Please enter your comment!
Please enter your name here