MOSKU (AFP).- Miembronan dje partido dje opositor ruso Alexei Navalni, kende a muri dia 16 di febrüari den un prizòn, a denunsiá ku servisionan funerario ta nenga na trasladá e kurpa pa e misa di Mòsku kaminda ku e entiero mester tuma lugá awe.
“Ta un bèrgwensa, e shofùrnan dje outonan fúnebre ta nenga na hiba Alexei”, segun Ivan Jdanov, un di e kolaboradornan a bisa.
“Pa kuminsá, no a permití pa nos hür un sala di funerario pa despedí di Alexei. I awor, ora kere ku e funerario lo tuma lugá den e misa, e agentenan funerario ta informá nos ku ningun outo fúnebre lo hiba e kurpa einan”, segun nan a bisa riba retnan sosial.
E empresanan funerario “ta risibí yamada di personanan deskonosí ku ta menasá nan si nan transportá e kurpa di Alexei”, segun e amigunan a denunsiá.
E entiero dje opositor di Kremlin ta programá pa keda derá awe tardi saliendo for di un misa den zùitost di Mòsku.
E aktivista anti-korupshon dos ora despues lo mester a keda derá den un santana serkano.
For di despues ku e kurpa dje opositor a keda entregá na su mama djasabra, e ekipo di Navalni a kuminsá buska un lugá pa ofresé un “despedida públiko”, pero tur petishon ku nan a hasi a keda nengá.
Famianan dje defuntu ta konvensí ku outoridatnan ta poniendo preshon riba kasnan mortuario pa loke ta e lugá kaminda ku e entiero mester tuma lugá.
