MADRID, SPAÑA (AFP).- Kondená djaluna pa paga un multa di mas di 7 mion euro pa froude fiskal na Spaña, e strea kolombiana Shakira a entregá 6.6 mion di euro den un otro kaso kontra di su persona.

Un tribunal pafó di Barcelona den luna di yüli a anunsiá ku ta start un proseso nobo kontra dje kantante di 46 aña, ku nan ta akusá di froude di belasting. Ta un asuntu di aña 2018 i ku a totalisá 6.6 mion euro entre interes i e montante ku normalmente e mester a paga.

E montante ei a keda entregá di parti dje artista na hustisia na final di ougùstùs último.

Segun e korant catalán El Periódico, e pago ei tabata loke e servisio di belasting a eksigí i ku e no tin nada di aber ku kulpabilidat ni su inosensia, sino ku lo ta “un demostrashon” di atendé su asuntunan finansiero ku belasting spañó.

E informashon aki a bira konosí despues ku Shakira djaluna último a yega na un akuerdo pa evitá un kaso di froude fiskal ku lo a bira un sirko di prensa. El a komprometé su mes na paga un multa di mas di shete mion euro.

E akuerdo ta inkluí un kondena total di tres aña di prizòn pa Shakira, pero ku lo keda suspendé a kambio di pago di un sanshon di 432.000 euro

pa e promé kaso ei, den kua servisio di belasting di Spaña ta akusá Shakira di no a paga belasting di 2012, 2013 i 2014, e kantante inisialmente a hasi un pago di 17.45 mion euro pa regla e situashon.

Ainda ta keda Shakira un otro kaso di belasting di aña 2011.

LAGA UN KOMENTARIO

Please enter your comment!
Please enter your name here