Branch di CIBANCO den siudat di México. Departamentu di Finansa di Merka a prohibí sierto transakshon ku e.o. e instituto finansiero aki komo parti di sanshon nobo relashoná ku e droga fentanilo.
CIUDAD DE MEXICO (AFP).- E presidente di México, Claudia Sheinbaum, ayera a duna di konosé ku “no tin ningun prueba” pa sostené e akusashon norteamerikano di labamentu di sèn di narkotráfiko kontra di tres institushon finansiero mehikano. Ala bes el a rekordá ku tin antesedentenan di kosnan ku Washington a yega di bisa, pero ku nan no por a proba.
Ayera e gobièrnu dje presidente norteamerikano Donald Trump, a akusá e bankonan mehikano CIBanco i Intercam i e kas di bolsa Vector di “labamentu di plaka” pa kartelnan di droga i a prohibí nan hasi “algun transferensia di fondo”.
E medida ta den kuadro dje krusada dje magnate republikano kontra di e tráfiko di fentanilo, den kua e ta akusá México di no ta hasi lo sufisiente pa kombatí esaki.
Sheinbaum, di su parti, ayera a trese dilanti ku e informashon publiká pa Departamento di Finansa norteamerikano no ta “kontundente”, pa sostené e akusashonnan.
“No tin prueba, ta djis papiamentu, pero no tin prueba di e asuntu di labamentu di sèn. “Si tin prueba, nan tin ku aktua manera ta e kaso ku kualke delito”, segun Sheinbaum.
“Nos tin antesedente den e relashon Mexico-Merka” den kua nan a formulá akusashonnan sin ku tabatin sufisiente prueba”, segun e presidente mexicano.
E la rekordá spesífikamente e kaso di Salvador Cienfuegos, eks-sekretario di defensa, ku Merka a detené den 2020 akusá di narkotráfiko, pero ku mester a keda liberá despues di reklamo fuerte di gobièrnu mehikano.
“Tabata asina fuerte, ku nan no tabatin prueba i mester a laga general Cienfuegos liber”, segun e mandatario ta kòrda.
Gobièrnu mehikano mas a leu a bisa ku na e momento aki nan mester a dekretá “intervenshon general temporal” di CI Banco i Intercam “ku e meta pa protehá e interesnan” di spardónan i otro figuranan di ámbos institushon, pa motibu dje implikashonnan ku e medidanan norteamerikano por tin pa e bankonan ei”, segun un komunikado di outoridatnan finansiero lokal.
Washington a akusá e entidatnan finansiero mehikano di a desempeñá un papel vital pa laba miónes di dollar dje gruponan di narkotrafikantenan i fasilitá pagonan pa kompra di material pa produsí fentanilo.
E medidanan lo impedí ku “nan lo hasi negoshi ku nos”, segun e supsekretario di finansa norteamerikano, Michael Faulkender.
E akusashon ta prohibí e tres institushonnan finansiero pa fasilitá sierto mandamentu di fondo, pero no ta trata di sanshonnan ekonómiko manera ta keda imponé di parti di Ofisina di Kontrol di Aktivonan Estranhero (OFAC) di Departamento di Finansa, segun nan a splika.
