Un parti dje muchanan di skol ku a keda sekuestrá luna pasá den e siudat di Minna, na Nigeria, a risibí nan libertat ayera tardi.
MINNA, Nigeria (AFP).- Komo shen studiante liberá despues di sekuestro di luna pasá den un skol katóliko di Nigeria, ayera a yega na sede dje gobièrnu di Mina, e kapital dje estado Niger, pero ainda no sa destino di 165 otro hóben. E alumnonan dje skol Santa Maria den Papiri, den su mayoria entre 10 i 17 aña, a yega den sinku bus eskoltá pa dies vehíkulo militar blindá, i a keda risibí pa e gobernador dje estado Niger, Mohammed Umaru Bago.
Dia 21 di novèmber, vários hòmber armá a sekuestrá 303 studiante i 12 maestro den un dje kasonan mas grandi di sekuestro den e pais. Alrededor di 50 mucha a logra skapa dje sekuestradónan despues dje atake.
Sekuestro den grupo ta algu frekuente na Nigeria, e mayoria perpetrá pa gènnan kriminal. Un dje promé nan a tuma lugá den 2014, tempu ku Boko Haram a sekuestrá 300 studiante de e siudat di Chibok. Un dékada despues ainda no sa di paradero di 90 di nan.
Nigeria, e pais mas poblá di Afrika ku 230 mion habitante, ta dividí den un mayoria musulman den nort miéntras ku den zùit ta kristianismo ta dominá.
E fenómeno di sekuestro pa pidi reskate a bira algu teribel den e pais akí. Den luna di novèmber a eksperensiá un ola importante di sekuestro den kua mas ku 400 persona tabata envolví.
