BOGOTA (AFP).- Defensor di pueblo di Colombia a denunsiá morto di shete menor di edat reklutá pa gueria den e bombardeo ku mas morto riba òrdu dje presidente Gustavo Petro, den un region di Amazona den zùit dje pais.
Meimei di krítikanan pre-elektoral i preshon di parti di Merka kontra e mandatario pa e para e narkotráfiko, Petro a intensifiká e ofensiva kontra di gruponan armá bombardiando esakinan, ku resultado di trinta morto siman pasá. E menornan a pèrdè nan bida den un kampamentu di disidentenan di loke tabata e grupo gueria FARC den e departamento di Guaviare (zùit), den e operashon di mas grandi dje tipo aki durante e gobièrnu di Petro.
Segun e último balansa, tabatin 20 morto. “E kos aki ta lamentabel, ta un guera doloroso i inhumano, afektando esnan mas vulnerabel. “Ta trata di menornan di edat reklutá pa e falta di protekshon i awe ta víktima di militarnan”, segun e defensor di pueblo, Iris Marin.
Mas lat, e hefe dje entidat a manda un balansa nobo ku a referí na mas menor ku a muri: “4 mucha muhé i 3 mucha hòmber… adolesente”, segun el a skibi riba X.
Marin a pone komo responsabel e gueria ku na kabes e hòmber mas buská dje pais, alias Iván Mordisco. Pero, tambe el a bisa ku “forsanan militar mester adoptá prekoushonnan faktibel pa protehá muchanan” bou di prinsipionan internashonal”.
Djamars, despues dje bombardeo ehérsito a informá dje “reskate” di tres menor kendenan tabata den man di gueria. “Klaro ku ta lamentabel e morto di tur hende, pero mas ainda menornan di edat. “Pero si mi a laga e 150 hòmbernan di Ivan Mordisko sigui avansá, nan lo a mata 20 hóben sòldá kendenan tabata algun kilometer nan dilanti”, segun Petro a defendé su mes riba X.
