GUAYAQUIL, ECUADOR.- Shete persona a keda asesiná djadumingu den provinsia di Guayas, na kosta di Ecuador, kaminda bandanan di narkotráfiko ta bringa pa poder den e área.
Sigur ocho pistolero a tira ku resultado ku shete persona a pèrdè nan bida i tres otro a resultá heridá den e lokalidat di Samborondón, ubiká den zùitwèst dje pais, segun e mayor Denni Cárdenas, hefe dje unidat polisial enkargá pa investigá homisidionan.
Cárdenas a duna di konosé ku na e sitio tabatin komo 200 persona kendenan a asistí na un pelea klandestino di gai. E suhetonan armá kendenan a yega riba bròmer, a kita nan pertenensianan.
Mas trempan polis a señalá riba ret sosial ku su “unidatnan spesialisá ta na e lugá investigando, ku e meta pa trese klaridat kiko a pasa i kapturá esnan responsabel”.
Outoridatnan te na e momento ei no a determiná si tabata un atake dirigí òf un robo.
E korant digital Primicias a publiká ku e pistoleronan “a kuminsá tira tras di otro, i algun kurpa tin te asta 40 tiru”.
Den gran parti di Ecuador, despues di un enkuesta popular den 2011, a prohibí espektákulonan ku ta inkluí morto di animalnan, manera pelea di gai.
Ecuador den último añanan a keda konbertí den esenario di masakre den prizònnan i riba kaya. For di 2021, alrededor di 460 prezu a keda asesiná.
