WILLEMSTAD.- Hopi outomobilista awendia ku haña but, no ta laga e fecha ku nan mester akudí na korte pa trese nan mal kontentu pasa bai.
Den mayoria kaso e shòfùr ta sali di bon i ta skapa un suma grandi di but ku e mester paga.
Resientemente korte di Promé Instansia a trata un kaso kaminda un shòfùr maskulino a haña but pa motibu ku polis a par’é i e no tabatin su faha di seguridat bistí.
Tampoko e tabata disponé di un seguro bálido na e momento ei.
Riba dje e shòfùr su papel di kùr tampoko tabata na òrdu.
E shòfùr a splika korte, ku e motibu dikon e no tabatin e papelnan serka dje na momento ku polis a par’é, ta pasó e vehíkulo tabata na garashi.
Segun e shòfùr, ora polis a par’é, ta nèt el a kaba di tuma e vehíkulo.
Dia di tratamentu di e kaso, e shòfùr a trese tur su dokumentonan i asina proba ku tur kos tabata nèchi na òrdu.
Wes por a mira ku bèrdat su seguro tabata pagá promé ku a par’é.
Fiskal ta hasi un demanda di 300 florin di but pa e hóben. Pa motibu ku dia ku polis a par’é e no por a mustra esaki.
Wes ta desviá for di demanda i a kondená e shòfùr solamente na un but di 50 florin, pa motibu ku e no tabatin e papelnan huntu kuné ora polis a par’é, pero sí e papelnan tabata na òrdu.
