Schottegat ta muchu importante pa lag’é bai pèrdí
WILLEMSTAD.- “Mi a tende promé minister Gilmar Pisas bisa ku e no ta mira futuro pa e refineria mas. Si ta bèrdat el a bis’e asina mi ta kontentu p’e pasobra e biaha aki e no a konta un mentira i bisa ku kos ku no ta kuadra manera ku e ta bai habri e refineria.”
Den e podcast, 3’or ku Gino David Dick pa tòg evaluá futuro di refineria ophetivamente i den esaki wak desaroyonan na mundu i tuma desishon. “Si disidí ku no ta sigui ku e refineria, ban kana un trayekto pa hasi algu bon pa Kòrsou. E ta un sitio muchu importante pa lag’é bai pèrdí.”
Dick ta remarká ku un diskushon ku ta keda bini bèk ta di hendenan ku tin konosementu tékniko di refineria ku ta bisa ku nan sa kon pa habri e refineria atrobe. “Si mi sa ku bo sa kon pa habri e refineria, pero na final di dia ta bai pa sèn i kapasidat. Ora e hende ta kumpli ku esakinan i si di bèrdat e ta un hende konfiabel, por sigui kuné.”
Dick ta mustra ku den pasado tabatin problema por ehèmpel ku hendenan ku ke a manehá e refineria, pero a presentá ku dokumentonan falsu. Ta e kompania Guandong Zhenrong a presentá su mes komo un kompania di estado Chines, pero a resultá ku no ta bèrdat. “Nan no tabatin respaldo di gobièrnu Chines. E direktor no por a sali for di China.”
Dick ta bisa ku el a sinta na hopi okashon ku representantenan di e kompania Chines. “A bai China ku hendenan lokal, pero a mustra nan yen kos ku no ta di nan. Pa kolmo ta Refineria di Kòrsou a paga e gastunan.”
Desaroyo
Riba otro terenonan tambe Dick ta konsehá pa bini ku mas maneho di vishon. Ora bo ta papia di bon gobernashon bo ta papia di próksimo generashon. Ta benefisio riba término largu mester wak i no e benefisio riba término kòrtiku.
“Klaro ku tin ku kome awe i hasi kos pa sobrebibí, pero si hasi daño na loke ta bin den futuro, mañan mi ta pega.” Un ehèmpel ku e ta menshoná ta konstrukshon di hotèl. Dick ta puntra su mes dikon e hotèl mester ta direktamente kantu di laman.
Na su opinion por traha e hotèl 5 minüt kana for di e laman. Esaki ta atraktivo tòg pa e turista, ta mihó pa naturalesa i ta laga e hende lokal tambe gosa di su propio isla pasobra e por mira laman segun e ta trafiká riba kaya. “Nos mester ta un tiki mas ophetivo i legumai bringamentu.”
