Si ke kaba ku violensia doméstiko, stòp abusu di mucha

Anna Sheila Albertoe ta na kabes di tim di maneho di Bos di Hubentut. Otro aña  Bos di Hubentut ta kumpli 30 aña  i e tambe ta na kabes pa 30 aña. Resientemente nan a lansa e signalenkaart, un proyekto pa konsientisá i pa por siña detektá posibel abusu di mucha i maltrato doméstiko. Sheila a konta Djasabra ku e signalenkaart ta un karchi di señalá kontra abuso di mucha i violensia doméstiko. Un karchi pa señalá ta pa hendenan ku ta traha den vèlt manera polis, trahadó sosial, hendenan ku ta traha na prisòn,dosentenan di skol; ta nan por señalá e problemanan ku por topa den nan trabou diario.

For di embaraso te na trafikashon humano

Riba e karchi ta kuminsá for di e parti di embaraso. E muhé na estado por ta mustra felis pero e por duna señal di hende ku ta wòrdu batí òf ku e ta keda prohibí sierto kosnan. Si ora e hende yega dòkter i e zùster por señalá, por puntra si e hende mester di yudansa. E tarea di un karchi di señal ta masha importante i p’esei tambe riba dje tin e idioma di amor. Por keda ku ta un amor felis pero e por duna señal di violensia doméstiko. E idioma di amor ta nifiká ku bo ta mira algu ku no ta real, tin algu tras di e kos bunita ei.  E idioma di amor ta referí na e víktima i agresor. Mas aleu den e karchi tin muchanan di 0 pa 4 aña  i tur ku su faktornan di riesgo ku por mira. Mas aleu ta sigui e edat di 4 pa 12 aña, 12 pa 18 aña.  Loverboys ta otro tema den e karchi di señal. E ta algu ku último añanan ta papia mas i mas di dje i e ta krea hopi doló den kasnan di famia. Mas aleu ta trata loke tin di aber ku trafikashon di hende, ku por pensa ku ta algu di awendia pero e tabata eksistí semper.  Esaki tambe ta papia di e víktima i e agresor.

Violensia doméstiko i abusu di mucha ta resaltá mas

Esnan ku mas ta resaltá segun Sheila, ta dependé den kua área di trabou ta referí na dje.  Sheila ta haña personalmente den e karchi di señal, esun ku mas ta bin dilanti ta violensia doméstiko i abusu di mucha. Ta algu ku lástimamente nan ta haña nan ku kasonan praktikamente tur siman. Den korant mes por mira kon polis ta anunsiá e violensianan doméstiko, ku mayoria bia ta mas haltu ku otro krímen. Awor e ta un krímen pero ántes tabata mir’é komo algu den pareha i nan tin di regl’é nan dos. Pero awendia den violensia doméstiko mester hasi denunsia i esun ku ta yuda e víktima mester tuma e keho i kana kaminda pa duna e víktima yudansa. Sino e víktima tin di keda kana su kaminda pa e haña yudansa i no aseptá ku kisas un polis no a atendé un kaso manera mester ta.

Hòmber tambe

Den violensia doméstiko no ta hende muhé so pero kontra hende hòmber tambe. Meskos e ta pasa pa mucha i hende muhé, e por pasa pa hende hòmber tambe. E diferensia ta ku e mucha hòmber bati na kas tambe ta violensia. I violensia di mucha tabat’ei tambe semper pero awe ta asept’é komo violensia. For di ora papia di batimentu ta algu robes kaba. Si ke stòp violensia doméstiko, mester stòp di dal mucha. Si stòp di dal mucha por stòp violensia doméstiko. Si e mucha hasi algu ku no ta bon, dun’é un time out i mand’é su kamber i dun’é un straf. Si e mucha a hasi algu ku no a kai bon sinta papia kuné i no grita sino e mucha ei lo bai hasi meskos ora e bira grandi. Si dal e mucha e tambe lo hasié ora e bira grandi. Si e mucha ta mira violensia, e lo bai praktik’é tambe pasobra ta esei el a kustumbrá kuné. Tur loke bo ke bo yu ta mañan, mester hink’é den dje awe. Ta einan e kambio ta bin segun Sheila. Si ta papia di violensia doméstiko ora e hende a pèrdè su bida, mester analisá kiko a pasa ku un víktima, un persona na chikí i kon bin el a bira un agresor. Niun hende ta nase agresor pero kiko ta pasa den un mucha su bida  ku e kos aki ta dal un buèlta. Esei ta pone analisá e situashon di violensia doméstiko i si ke kaba kuné mester stòp abusu di mucha.

Reeduká e komunidat

E palabra aseptashon ta masha importante. Sheila ta kere ku dor di kibra ku e tabú i papia di e violensia, dor di yama tur kos na su nòmber bo ta krea den komunidat un edukashon nobo. Ta reeduká personanan, e komunidat, dor di drenta skol manera nan di Bos di Hubentut a hasi pa papia di abusu di mucha i tur e abusunan ku ta eksistí. Tin abusu seksual, violensia doméstiko pero tin negligensia di mucha tambe ku tambe ta un abusu. E mucha ku ta keda kana riba kaya i niun hende ta wòri ku el a kome, e ta kana sushi, kana di porta pa porta, e ta kontra derechinan di mucha. Tin diferente tipo di abusu i siña e mucha pa yama tur kos ta su nòmber, i asina traha un generashon nobo. Esei ta pa e chikitinnan ku ta krese, pa aki algun aña  tur hende ta konsiente pa no hasi otro daño, karga empatia pa komprondé otro i komprondé i no hasi doló na otro, balorá otro. Ta kosnan segun Sheila por siña e yu for di chikí i no por logr’é si ta bati e mucha i maltrat’é. Loke ku duna, e simia ku planta, ta su fruta ta kosecha. Lástimamente e ta poko fèrfelu pasobra esun ku a hasi daño a siñ’e di un otro. A algu ku a pasa di generashon pa generashon i úniko manera pa par’e ta dor di hasi hende konsiente.

Den e karchi di señal tin e diferente instansianan ku por aserká ora tin un ke otro situashon ku a tuma nota di dje. Tin bia ni e profeshonal sa e kaminda pa kana i p’esei e karchi di señalá pa sa kon i unda pa kana pa buska yudansa pa e persona ku tin mester di esaki.

Pedo

Algun aña pasá kasonan di abusu tabata parse manera nan no tin hopi peso pero despues mas e tópiko aki bin dilanti, mas komunidat ta poniendo preshon riba e sistema hudisial. Por ehèmpel un punto masha kardinal ku ántes tabata bin dilanti ta ku e parti di abusu seksual ta ku ántes ta bai polis i nan ta puntra si tabatin penetrashon pasobra si no tabatin penetrashon no tin abusu. Pero esaki ta falta di konosementu pasobra abusu seksual ta tur kos seksual ku ta tuma lugá asta si e mucha ta wak un porno film. E kadena hudisial tabata komprondé diferente manera pero dor di keda eduká, kuminsá na bo mes, i Sheila a referí na internashonalmente. Por ehèmpel tin e sosial media ‘grooming’ meskos ku sexting. Antes no tabata papia di nan pasobra no tabatin e media sosial manera ántes. Na Ulanda por ehèmpel tin kaso di mucha chikí ku a mata nan kurpa despues ku nan video a bai rònt. Na Kòrsou tambe tin videonan a bai rònt pero nos no sa kiko e resultado ta despues. Ora e kos pasa den notisia hende ta wòri un ratu, ta kompartí video di menor di edat ku ta kastigabel i mester eduká hende di dje. Kosnan ku ántes no tabata bin dilanti, awendia e ta bin dilanti na diferente manera. Si ántes tabata papia di Pedo, tin hende no sa mes ta kiko. Tin Pedofil i Pedoseksual. Un pedo ta mira un mucha, gusta e mucha, e ta sinti e satisfakshon pero no ta mishi pero un pedoseksual semper ta mishi. I loke ta masha remarkabel ta ku e mucha den e situashon ei ta pensa ku ta su falta pasobra e pedoseksual ta yama e mucha afó, dun’é kos, trat’é bon i e mucha inosente ta kuminsá sinti ku ta su falta ku e kos ta tuma lugá, siendo no ta su falta. EpPedoseksual tampoko por yuda pasobra ta manera e ta; unda ku e bai e ta sigui ku e akto ei. E tin di realisá ku e tin mester di yudansa pero na Kòrsou no tin un maneho pa yuda e hendenan aki.

No tin maneho

Sheila ta kere ku asta mester yega na registrashon di Pedoseksualnan. Tur pais konosé, pero na Kòrsou no tin maneho riba Pedoseksual. Ta keda dil ku e sirkulo visioso aki; e Pedo ta bai será, e no ta haña masha aña, e ta sali, drenta bida di kualke otro yu i e kos ta sigui ripití. I p’esei Sheila ta hasi yamada na parlamentarionan ku si bèrdat derechi di mucha ta importante, mester bin maneho riba derechi di mucha realmente. Den abusu di mucha hopi bia no por mir’é riba e agresor su kara. I no ta hende hòmber so pero hende muhé tambe ta den e situashonnan aki. Nan a yega di haña kaso kaminda un hende ku ta wak yu (Yaya o babysitter) a abusá di dos mucha chikí i e mayornan a haña sa pasobra nan tabatin kámara den kas. I tabata un abusu seksual pero unda e señora ei ta awe? E ta sigui wak yu di hende? No tin registrashon di e hendenan aki. Sheila ta kere ku mester yega na un TBS Kliniek. Kada bes ku ta bisa ku mucha ta importante, mester wak tur e komponentenan di mucha pa mira si tur kos ta na òrdu pa ora algu pasa por protehá e mucha di e sistema. I mester evitá tambe ku e víktima ta bira víktima dos bia. Esaki teniendo na kuenta ku kasonan ku ta bin dilanti i e agresor ta sali pasobra no tin sufisiente prueba.

Hopi trabou, hopi desaroyo

Teniendo na kuenta ku Bos di Hubentut ta bai kumpli 30 aña, Sheila a bisa ku tabatin diferente desaroyo. Esaki lo mester bira un programa apart teniendo na kuenta kos a sosodé. Loke Sheila si por bisa ta ku tabatin desaroyo. Gobièrnu a kuminsá pone atenshon i asta a saka un buki riba derechi di mucha. Tin e e plataforma riba derechi di mucha, diferente konferensia i tayernan riba e tema, a yuda lanta Aliansa na morto di Nihaila e tempu ei, tin asta tantu kos a pasa ku Sheila por konkluí ku tabatin un desaroyo. Nan por drenta tur skol di Kòrsou, tin hende ku ta yuda pa asina por traha material pa drenta skol. I pronto lo lansa materialnan nobo, bukinan nobo i hopi mas. Sheila ta orguyoso di e desaroyo i hende ta hopi mas konsiente ku kisas 10 aña pasá. I Kòrsou tin e programa ku niun otro isla no tin i esei ta hasi Sheila aun mas orguyoso di loke nan a logra te ainda.