WILLEMSTAD.- Gilbert Martina direktor Hospital Nobo Otrobanda ta pone énfasis ku seguridat di hospital Nobo ta di gran importansia pa e pashènt i pa e trahadónan i si no por garantisá esaki e hospital lo no habri.
E reakshon di sr. Martina a bin despues di publikashon den korant ulandes i tambe aki na Kòrsou ku e pashènt lo ta na peliger den hospital nobo. Tin rapòrt di AT Osborne ku a inspekshoná e hospital i ku a trese su preokupashonnan dilanti pa ku vários kos ku no a kana segun eksigensianan di seguridat i mas ainda pa un hospital. Tin dos rapòrt di AT Osborne ku ta di 4 i 18 di òktober.
Segun Gilbert Martina e ta na altura di e informashonnan ei i e kompania AT Osborne a hasi e kontròl di kualidat di e konstrukshon i nan a señalá en bèrdat puntonan ku tin atenshon i ku mester drecha. Pero esaki ta un proseso konstante ku ta kanando, segun e direktor general di HNO.
Ballast a tuma nota di e informashonnan i ta trahando riba e puntonan pa drecha esakinan. I miéntras tantu ta kasi dos siman despues di e di dos rapòrt di AT Osborne i hopi kos ya a keda drecha.
Dos kos ta importante segun sr. Martina; e seguridat di pashènt i di e trahadó. Ta nan dos ta tene kuenta kuné i inspektor ta hasi na final e verifikashon di tur e espasionan médiko i ta inspektor ta esun indiká pa bisa ku e espasionan ta konforme normanan ku tin i si nan ta sigur òf no.
Kontròl di kalidat di konstrukshon ta den man di Ballast i AT Osborne i gerensia di CMC i na final inspektor ta validá esaki.
“I si nos no por garantisá e seguridat, nos no por habri Hospital. Mi a bisé esei tur kaminda i mi ta keda pone énfasis riba dje”, Gilbert Martina a bisa den e entrevista ku EXTRA. Sr. Martina no ta komprondé dikon e informashonnan ei ta sali awor aki, pasobra ta un proseso e ta ku ta kanando i na final ta inspekshon ta esun ku ta hasi e balidashon si tur parti médiko ta segun seguridat pa e pashènt i e personal i si esaki ta garantisá e hospital ta habri.
