WILLEMSTAD.- For di sifra ku Ofisina Sentral di Statistik (CBS) a publiká ta indiká ku e nivel di preis promedio a subi ku 1,0 porshento na luna di ougùstùs 2022 kompará ku luna di yüli 2022. E sifra di inflashon a subi te na 5.8 porshento na luna di ougùstùs 2022
Desaroyo di preis luna di ougùstùs 2022 kompará ku luna di yüli 2022
E sifra índise di preis pa konsumidó (CPI, “Consumer Price Index”) di Kòrsou a subi ku 1,0 porshento na luna di ougùstùs 2022 kompará ku luna di yüli 2022, esta di 115.0 na yüli 2022 pa 116.1 na ougùstùs 2022.
E kambionan di preis spesífiko ku mas a sobresalí durante luna di ougùstùs 2022 ta; subida di kuminda (2,1%), muebel i aparatonan doméstiko (1,4%), sobra (1,0%), diesel (4,6%), elektrisidat (3,2%), awa (2,5%), gasolin (0,3%)
mas barata a bira kerosin (-11,6)
CPI di ougùstùs 2022 (116.1) ta 8,7 porshento mas haltu ku e CPI di yüli 2021 (106,8). E sifranan aki ta indiká ku e nivel di preis pa konsumidó durante luna di ougùstùs 2022 ta 8,7% mas haltu kompará ku e mes un luna na aña 2021.
E kategorianan ku a kontribuí mas tantu na e subida aki ta kuminda (13,2%), muebel i aparatonan doméstiko (12,4%) i transporte i komunikashon (13,8%)
Desaroyo di preis riba término largu
Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba término largu (usualmente 12 luna). E sifra di inflashon pues ta duna un indikashon di e subida promedio di kosto di bida, i p’esei ta ser rekomendá komo instrumento pa indeksashon di salario, penshun, ònderstant/ benefisio sosial, suèldu mínimo i otro entrada.
Inflashon den un sierto luna ta ser kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si kompará e periodo di e último 12 luna te ku ougùstùs 2022 ku mes periodo un aña anterior, ta resultá ku preisnan na averahe a subi ku 5,8 porshento: e CPI promedio di 12 luna a desaroyá di 104.7 na ougùstùs 2021 pa 110.7 na ougùstùs 2022.
Pa mas informashon por konsultá e wèpsait di CBS, www.cbs.cw.
