AUGUSTO CURY; posibel di tres kandidato pa elekshon presidensial na Brasil.
BRASILIA (AFP).- Tin un di tres persona huntu ku Lula i Bolsonaro? Un popular sikiater outor di bukinan riba yudansa propio ta buska pa penetrá komo un di tres persona entre e presidente iskierdista Luiz Inacio Lula da Silva i e konservador Flavio Bolsonaro.
Augusto Cury (67) a kuminsá gana popularidat despues di su aparishon den un debate presidensial di televishon na kua ni Lula ni e senador Flavio Bolsonario a partisipá. Un enkuesta dje empresa Quaest publiká ayera a posishoná Cury na di tres puesto ku 10% di e intenshon di voto. Ainda e ta leu for di e 37% di Lula i e 29% di Bolsonaro, pero tambe e ta leu for di otro kandidatonan ku no ta superá 3%.
E kresementu tambe ta keda reflehá riba retnan sosial di Cury, kende su obranan manera “E maestro di amor” a keda tradusí den vários idioma. Awor akí el a gana 2.2 mion siguidó riba Instagram den último siman.
De un pais hopi polarisá entre e derecha “bolsonarita” i e iskierda ku ta apoyá un di kuater mandato di Lula, Cury ta presentá komo un di tres opshon ku e slogan “Brasil solamente ke ta felis”.
“Mi ke kaba ku e pelea ei. No tin dos barku, tin unu so i esei yama ‘Famia brasilero’”, segun Cury a bisa siman pasá den un evento públiko na Sao Paulo. Tambe el a bisa di tin gana di midi forsa ku Lula den di dos buèlta di elekshon. Su eksperensia polítiko ta data di 15 aña pasá i ta limitá pa su presensia den ”Partido Verde” di iskierda, pero sin a yega na disputá ningun trabou públiko.
