Jetseline Legito

(+5999) 515-7783

Facebook;. Finansa Hubenil

 

Siña e mucha for di chikí manehá su sèn

…Finansa Hubenil ta e pakete riba merkado aktualmente pa siña nos chikitinnan kon manehá nan sèn. Jetseline Legito (Jessi) ta e persona ku a bin ku e pakete di buki aki. Un pakete kolorido i masha atraktivo pa muchanan.

Un mucha for di chikí ta risibí e ehèmpel di kon manehá nan finansa dor di mira loke nan mayornan ta hasi. I loke bo mira loke bo mayornan ta hasi bo ta hasi. I si e maneho finansiero na kas no ta bon, di bo tampoko lo ta bon. Pa añanan Jessi a hiba un maneho finansiero ku no tabata muchu bon (no asina malu tampoko). Mas sèn e hende pidi mas su nivel di bida ta subi i ta yega e sèn ku bo ta pidi lihé. I no ta e hopi sèn bo mester pero bo mester manehá esun ku bo tin bon.

 

Les na Merka

Ta den e kuadro aki Jessi a bai sigui un kurso pa siñ’é kon manehá su asuntunan finansiero na Merka. I einan Jessi a ripará ku ta siña muchanan for di 3 aña kon manehá nan sèn. Na Kòrsou e ta sosodé otro. Pero tin hopi programa na Merka pa siña e muchanan pa manehá nan finansa. I kaminda el a bai e lès, el a siñ’é manera el a bin kuné aki.

 

                                Kuater tema

Ta trata di un buki, bòrchi, 3 etuí. E buki tin 4 tema;

*Un di nan ta siña e mucha importansia di trabou. E por siñ’é for di chikí rondó di kas mes. Tin trabou ta su deber i  responsabilidat komo parti di famia. E ta siña tambe ku tin trabounan èkstra pa e traha i gana sèn ku e ta hasi rondó di kas ku e ta gana un zakgeld.

*Otro tema ta siña e mucha gasta responsabel. Kada sèn su propósito i kada sèn tin su nòmber. I p’esei kada etuí tin su nòmber; gasta, spar i duna pa kos importante.

*E buki tin tambe e tema di spar. E ta siña e mucha pa spar i tene pasenshi. Den komunidat awor aki tur hende ke tur kos mesora i mester saka e mentalidat ei for di nos hendenan. I e mihó manera pa hasié ta dor di siña e mucha for di chikí. Pa  e spar, tene pasenshi i asina bo ta balorá loke bo tin.

*E otro tema ta duna pa yuda otro. Esei ta algu ku mucha mester siña for di chikí. No tur kos ta tuma tuma so pero yuda otro hende tambe.

 

Kuminsá for di 3 aña

Ounke e mucha no por lesa for di 3 aña, e mayor ta esun ku tin di guia e mucha. Den e buki te patras tin e guia pa e mayornan. E guia pa mayor tin diferente tep pa siña e mayor kiko e por laga e mucha hasi rondó di kas for di ora e mucha tin 3 aña.

 

Jessi nunka a pensa di bira eskritor/outor. Pero segun tempu ta bai buskando kiko e ta mihó den dje el a deskubrí ku e ta gusta skibi i skibiendo e ta ekspresá su mes mihó. Banda di e buki aki e tin mas ku el a skibi pero no a publik’é ainda.

E buki aki a bira posibel danki na Fundashon pa Konsumidó (FpK). Pa otro aña tin planiá huntu ku FpK pa e muchanan ku tin nan pakete organisá workshop pa siña nan kon nan ta bai dor di e kuater temanan.


Sostené pa Fundashon pa Konsumidó

Tambe ta den plan pa bai skol. Huntu ku Fundashon pa Konsumidó otro aña lo wak kon ta pasa e konosementu aki tambe over na skolnan. En total a dura Jessi 3 aña pa e por a yega na e buki di finansa hubenil. E buki a keda trahá na Kòrsou mes. Uniko kos ku a keda importá ta e etuínan. E tas i bòrchi trahá na Kòrsou. Jessi a splika ku e mes ta gusta e bòrchi. Ku e bòrchi aki por palabrá ku e yu kiko ta e tareanan ku e ke hasi i e komishon ku e mayor ta bai dun’é i e dianan ku e ta hasié i e total di komishon pa siman. Algu masha bunita riba e bòrchi ta ku e yu por pone e potrèt di e opheto ku e ke yega na dje. E potrèt ei ta lag’é sigui enfoká ku ta einan e ke yega i e ta keda wak kuantu sèn e tin di spar i kuantu e falta pa yega na su meta. E pakete aki ta optenibel na librerianan i na Fundashon pa Konsumidó na Waaigat.

Ta un pakete amplio i ta dependé kuantu tempu ta dediká na dje, por pasa dor di e pakete. Por hasié lihé i por dura mas largu.

 

Lo sigui skibi

I awor ku Jessi a kuminsá skibi, e ke bai dor. E ke skibi buki stabilidat finansiero pa nos siguiente general pa konsientisá mayornan pa guia nan yu for di chikí i kambia e mentalidat finansiero for di chikí pa nan no haña nan ku problema finansiero na grandi. Despues di stabilidat finansiero pa e siguiente general, Jessi ke hasi algu pa hende grandi mes. E ke usa su propio ehèmpel kon el a stabilisá su mes finansieramente i e lo yama e buki Liber porfin. I ku tur su bukinan Jessi lo organisá tayernan.

 

                          Dirigí riba finansa

Jessi lo sigui ku su bukinan dirigí riba e parti finansiero. Esei pasobra ta algu ku e mes a ‘struggle’ kuné i e ke yuda otro hende kuné tambe. Jessi ta rekomendá tur mayor pa buska e pakete aki pa nan yu. Prinsipalmente mayornan ku tin problema finansiero i no ke esei pa nan yu. Ta bon pa yuda e yu for di chikí. Jessi ta mira mayornan ta invertí nan sèn hopi biaha den kosnan manera aktividatnan kostoso i ora yega e momentu pa e yu ta na bùrt nan ta pensa hopi promé invertí den dje. Ta bon pa invertí den e yu pa nan ta un kambio pa nos komunidat den futuro.

LAGA UN KOMENTARIO

Please enter your comment!
Please enter your name here