Vienna Mendeszoon
WKDN Café
E wikènt aki ta di WKDN Cafe den Punda. Ta trata aki di un idea di Vienna Mendeszoon ku a kuminsá ku kòfi for di tempu e tabata studia na Ulanda. Einan su amor pa kòfi a kuminsá, kaminda e tabata duna su amigunan tasting aki i aya den su kamber. I asina e amor a sigui krese. Un bia su mama a invit’é pa bai Colombia kaminda e posibilidat a bin pa e siña un tiki mas di kòfi. Einan el a siña hopi mas di kòfi i a disidí di sigui traha riba e amor pa kòfi aki.
A lanta ku kòfi
Vienna a lanta den kas ku su tawela ta bebe kòfi ku yen suku aden i semper e kier a purba un tiki. Asina el a sigui bebe Kòfi i ora el a bai studia afó tambe el a sigui bebe kòfi. E ta kòrda ku tempu Starbucks a habri na Kòrsou ta kasi tur dia e tabata eiden ta kumpra kòfi, despues di skol. E ta kòrda asta un bia Starbucks a publiká un potrèt di hóbennan ku ta bai sinta studia den e lugá i e tabata un di nan riba e potrèt ei. Semper Kòfi ta parti di su bida.
Su pashon i hòbi
Vienna gusta loke e ta hasiendo. El a studia i tabata un poko difísil pa skohe kua direkshon e bai, sea kòfi òf su trabou. Kòfi ta mas un pashon i su hòbi pero e ta siña hopi hende di dje. Ora el a bin Kòrsou bèk el a disidí di sigui traha riba e pashon aki i a kuminsá ku WKND Cafe. E nòmber ta bisa kiko e ta, esta e ta habri wikènt so pasobra Vienna ke sigui traha tambe.
Tasting òf tayer
Na luna di mart último WKND Cafe a lanta ofisialmente ounke e tabata hasié kaba aki i aya i spesialmente na eventonan privá. Tin bia na eventonan di hasimentu di aña e tabata duna tayernan di kòfi. Ta algu parse ku hende ta gusta masha i e por ta den dos diferente manera. Vienna por hasi tasting i tambe e tayernan di kòfi. Ora di tayer ta siña mas over di e mashinnan i kon traha kòfi na kas. I tin hende ku ke siña un tiki mas di kòfi, por ehèmpel kon e kòfi di Colombia ta smak, kiko pa buska mas tras di e tasting di kòfi di Etiopia, kiko ta hole di kòfi di Sur Afrika. Esei ta e diferensia entre e tayer i e tasting. Na esun bo ta siña realmente traha ku e mashin i e kòfi i den kaso di tasting ta mas bien purba i tur e trikinan ku esaki ta trese kuné di kòfinan rònt mundu.
Kopi Luwak; un di e mihó kòfinan na mundu
Loke a hala nos atenshon ta e kòfi Kopi Luwak; esei ta e kòfi ku un bestia ta kome e fruta i sake afó. E proseso di fermentashon ta pone ku e kòfi ta smak diferente. Vienna a bisa ku su mama ta stima e kòfi ei i den su tastingnan e ta laga purba e kòfi ei. Ta trata di e di dos mihó kòfi na mundu. Esei ta mustra ku su kòfinan ta hopi apart i ku e ta ofresé na e partisipantenan den su tasting òf tayer. Vienna a profundisá su mes den kòfi. El a menshoná paisnan manera Brasil, Perú, Colombia, pero tin mas kòfi manera resientemente el a bishita Zwitserland kaminda el a tawela ku un kòfi di Papua New Guinea ku nunka e tabata sa ku ta eksistí. Ainda e no a purba e kòfi aki. Pero asina tin mas pais ku tin kòfi ku nos no sa di dje.
Diferente smak
Loke ta fasinante di kòfi ta ku di tur pais e ta smak diferente. Loke ta hunga un ròl ta e tera, e haltura, kon e ta krese. Nunka bo ta kana di purba un kòfi, esei djis pa haña un idea kuantu kòfi tin na mundu. Pa Vienna e kòfi ku mas el a gusta te ainda ta kòfi di Etiopia. E kòfi ei ta mas suave. Na Kòrsou nos a kustumbrá mas ku e Nescafe òf kòfi di Colombia pero eseinan ta mas marga siendo un kòfi mester ta suave riba bo lenga i esei ta di Etiopia. Esun di Etiopia tin e sabor di fruta meskos ku un glas di biña por smak ounke no asina zut.
Biña i kòfi
No ta algu ku nos a kustumbrá kuné, esta tasting di Kòfi. Nos a kustumbrá ku tasting di biña pero segun e splikashon di Vienna, Kòfi tambe tin su ‘after tasting’. I esaki ta netamente loke e ke trese den pueblo i esei den mei próksimo e lo tin un evento kaminda lo bai wak e biña i kòfi di Colombia i kon paresido e sabor final ta. Tin diferente region di kòfi i biña i hende por bai siña ku ounke ta dos kos diferente tòg na final tin e sabor ku bo ta sinti ku ta práktikamente meskos. I meskos ku ta hole i purba biña, meskos ta hasié ku kòfi.
Kòfi pa kada momentu
Si den kaso di biña por skohe entre un biña ora di kome karni òf ora di kome piská, den kaso di kòfi no ta trata di loke bo ta kome, pero si kon bo ta sinti bu e dia ei. Si tin un dia pisá bo ta dal un kòfi di Brasil ku ta mas pisa. Si ta riba un djasabra pa sinta saboriá di un kòfi, purba unu di Etiopia i asina sinti e sabor na final. Tur kos ta dependé di e intenshon òf si djis ke un tiki kòfi pa sigui move. Bayendo un tiki mas profundo Vienna a bisa ku un bon kòfi no mester di suku. E suku ta kambia su smak. Tin hende ta gusta e kòfi zut pero pe un bon kòfi no mester di suku ya asina bo ta saboriá e kòfi.
Bira un Barista
Den su eventonan Vienna ta ofresé tambe kòfi pa e partisipantenan por kumpra. WKND Cafe tin e parti kaminda hende ta bai serka dje i saboriá un kòfi i e otro parti di dje ta mas basa riba komunidat. Vienna sa ku tin un desaroyo grandi den horeka i e ke duna kurso pa e hende por para na final komo barista. E ta pensa mas den direkshon di hende ku tin difikultat pa drenta bèk den komunidat. Hendenan ku ta bin di un fundashon òf JJIC. Su kurason ta pa hendenan ku por drenta komunidat mas lihé. E ta pa e hende ku ke un trabou pa asina e tin e entrenamentu básiko ku e solisitá abase di esei i haña un trabou finalmente.
Kòfi ta salú
Nos tabata interesá pa sa di Vienna ku a profundisá den kòfi si esaki ta bon pa salú. El a splika nos di un estudio resientemente ku ta mustra ku e ta bon pa salú i ta yuda ku diferente kos. Vienna a haña remarkabel kon ántes tabata bisa biña no ta bon pa slaú, pero despues a resultá ku e ta bon i awor ku kòfi tambe. Ta asta enkurashá e hende pa bebe tiki kòfi ku tin su benefishinan. Vienna ta pensa ku kòfi ta bon i e ta un momentu pa konektá ku otro, loke hende mester den bida.
E wikènt aki den Punda
Pa loke ta e aktividatnan di WKND Cafe Vienna a bisa ku e wikènt aki, ku ta e wikènt di selebrashon di aña di rei, nan lo tei den hanchi Snoa dia 25, 26 i 27 kaminda henter dia lo tei pa sirbi hende kòfi. Lo tin diferente evento riba e dianan ei i tambe por spera e tasting ku ta awe 25 di aprel. I e ta hasi e tasting pasobra hende ta hañ’e hopi atraktivo. Durante di e wikènt aki lo tin Coffeehour i lo tin Koningsnacht. Un wikènt yená pa pasa i purba kòfi.
Ku téknika por traha diseño riba kòfi
Ya ku nos tabatin Vienna den kas nos kier a sa di dje si ta algu spesial ta usa pa traha diseño den kòfi. Por ehèmpel ora bestèl un Capuchino i e bin ku e kurason riba dje.El a splika ku ta simplemente ku man ta hasié. Ta kuminsá ku e lechi ku tin di haña airu pa e haña e lag. Ta trata di téknika. I e bashamentu di e lechi tambe ta un téknika ku ta usa. I tur esei por siña durante di e tayernan k Vienna ta duna. I no ta nesesariamente mester di un mashin pa logra un diseño.
Por sigui Vienna riba media sosial na WKNDcafe.cw kaminda e ta duna e lugánan kaminda e lo ta tur siman. Vienna ainda ta pensando unda e lo ke ta aki 10 aña ku su emprendimentu. E ta wak su mes komo un hende ku ta duna bèk na su pais i ta gosa di bida. I ku gosa di bisa ta traspasá e konosementu over na otronan. E ta un profeshonal den organisashon den su trabou diario. E ta gusta mira hende bai dilanti i konektá ku otronan i esei su trabou ta tambe.
Kopi Luwak; Ta trata di un di e kòfinan di mas karu na mundu. E ta produsí di chèri ku e Asian Palm Civet ta kome, digerí i saka bèk den su shushi. E proseso digestivo ta redusí e marga i ta krea un sabor suave. Kopi Luwak ta original di Indonesia (Sumatra, Java, Bali) durante kolonialismo ulandes.
