Gobièrnu ke eliminá 12,5 porshento entrante 1-1-’24
WILLEMSTAD.- Informashon ku sindikatonan representá den e órgano di konsulta, GOA ta disponé di dje ta indiká ku e proposishon ku Konseho di Minister a aprobá pa eliminá e medida di kòrta ku 12,5 porshento den kondishon laboral di empleadonan públiko ta bai bèk te promé di yanüari 2024. E sindikato ta eksigí pa bai bèk te promé di yanüari 2023.
Esaki no solamente pa e empleado públiko haña indeksashon di salario na 2023 tambe, pero e ta duna e penshonado tambe posibilidat pa haña indeksashon di nan penshun pasobra na 2023 e grado di kobertura di APC ta permití esaki. Asina tantu presidente di StrAF, Juan Lourens komo presidente di ABVO, George Hernandez ta deklará pa EXTRA.
Lourens ta hasi un apelashon riba militansia sindikal bisando ku si e ámtenar no sali pa su propio derechonan otronan no ta hasié pe. E ta mustra ku empleadonan públiko ta e únikonan ku ta karga ainda ku medidanan ku a tuma den kuadro di e pandemia di covid-19.
“Tin partimentu di kos pa loko, pero e empleado públiko ainda ta warda riba e kambio di lei di 12,5 porshento. Ta gobièrnu ta su doño di trabou, pues e empleado públiko tin ku komprondé ku e mes tin ku sali pa su derechi.”
E lei pa kòrta ku 12,5 porshento den kondishon laboral di empleadonan públiko a drenta na vigor promé di yanüari 2020 i tabata kondishon di Hulanda pa duna Kòrsou sosten di likides durante pandemia di Corona. Na 2022 sinembargo a duna ámtenarnan pago di plaka di fakansi i dianan di fakansi bèk. Ora trese kambio den e lei e ámtenar ta haña derecho atrobe pa alabes kobra indeksashon, “loontrede” i lumpsum.
Hernandez tambe a bisa resientemente den un reakshon kòrtiku ku ABVO ta warda ku ansiedat pa e minister presentá den GOA ku e proposishon di lei inkluso tur kalkulashon. Tambe e ta pidi tur miembro pa keda pendiente pa risibí mas informashon di nan sindikato.
Penshonado
Lourens i Hernandez ta hasi un apelashon riba penshonadonan pa nan uni i lucha pa nan propio kousa. “Si por a uni tras di un fantasia pa kobra prima di FZOG penshonadonan mester sali bòshi aworakí i bai Fòrti pasobra esaki ta algu konkreto ku nan por risibí”, Hernandez ta bisa.
E ta pidi penshonadonan pa keda alerta pasobra si gobièrnu nenga di eliminá e medidanan pa kòrta den kondishon di ámtenar ku forsa rertroaktivo te 1 di yanüari 2023, e penshonado tambe ta pèrdè indeksashon di salario. Awe den e reunion semanal di ABVO ku grupo di penshonadonan afiliá lo trese e punto aki dilanti.
Lourens di su parti ta hasi un apelashon riba militansia di penshonadonan meskos ku e ta hasi esaki riba ámtenarnan. E tambe ta mustra ku si penshonadonan por a sali riba un fantasia di FZOG ku nan mester uni pa lucha pa nan indeksashon ku ta algu real.
Reunion
E reunion di GOA ku tur probabilidat lo tuma lugá te 9 sèptèmber. Esaki ta e reunion regular ku ta tuma tur luna. Eks minister di BPD, Ornelio ‘Kid’ Martina a primintí e sindikatonan ku asina Konseho di Minister aprobá e proposishon di lei ku e lo laga yama un reunion ekstraordinario promé ku e reunion regular. Aktual Minister di BPD, Shalten Hato te ainda no a mustra niun intenshon di kumpli ku e promesa ku Martina a hasi.
Foto:
…Juan Lourens…
…George Hernandez…
