DAMASCUS, SIRIA, AP.- Siria, Turkia i algun pais mas a kritiká e deklarashon abrupto di presidente Donald Trump, indikando ku Washington lo rekonosé soberania di Israel riba Golan Heights, okupá pa e gobièrnu israelí.
E gobièrnu sirio a kalifiká e deklarashon komo “iresponsabel” i un menasa kontra pas i stabilidat internashonal, miéntras e Ministerio di Eksterior iraní a bisa ku esaki lo hinka e region den un krísis nobo.
E Ministerio di Eksterior na Damascus a bisa ku Trump su deklarashon ta konfirmá e “parsialidat siegu di Merka pa e entidat zionista”, refiriendo na Israel. E ministerio a agregá ku lo no kambia e echo ku Golan tabata i lo kontinuá komo árabe i sirio”.
E anunsio di Trump tabata un gran kambio den e polítika merikano i a duna un empuhe polítiko na promé minister israelí Benjamin Netanyahu un luna promé ku elekshon den su pais.
E gobièrnu di Merka tabata konsiderando pa rekonosé Israel su soberania riba e teritorio ya pa algun tempu kaba. E gobièrnu israelí a kita e teritorio for di Siria na aña 1967, i Netanyahu a enfatisá e tema na e sekretario di Estado merikano, Mike Pompeo na momentu ku el a bishitá Israel.
Israel a aneksá unilateralmente na Golan Heights na aña 1981. Resolushon 497 di Konseho di Seguridat di Nashon Uní, emití despues di e aneksashon, ta kalifiká Israel komo un “poder invasor” i ta bisa ku e medidanan di Israel pa “pone su leinan, hurisdikshon i atministrashon riba e teritorio sirio okupá di Golan Heights ta nulo i no bálido. Ademas nan no tin efekto legal internashonal”.
