POR-AU-PRINCE, HAITI.- E poblashon di Haiti “ta sigui sufri violashon di tur su derechinan humano” di parti di gèngnan, miéntras ku polis lokal i e forsa internashonal di seguridat ta karesé di material pa por paranan, segun e eksperto di Nashonnan Uní William O’Neil, den un komunikado.
“Mester pone un fin na e agonia persistente aki. Ta un kareda kontra di oloshi”, segun e funshonario na final di un bishita di 12 dia na e pais karibense.
“Polis no tin e kapasidat logístiko i tampoko tékniko pa para e ekspanshon di krímen kontra di bandanan kriminal ku ta sigui risibí arma apesar dje embargo internashonal”, segun e eksperto a lamentá.
Mientrastantu, e Mishon Multinashonal di Apoyo i Seguridat na Haiti, outorisá pa Konseho di Seguridat di Nashonnan Uní den òktober di 2023, “a desplegá ménos ku un kuart di e trabou ku e mester a hasi” i ta konta ku material “ku no ta sirbi i rekursonan ku no ta sufisiente”.
E gèngnan, mientrastantu, tin kontròl riba mas di 80% dje Port-Au-Prince i e prinsipal kareteranan dje pais.
“E poblashon ta sigui sufri violashon di tur nan derechinan humano. E violensia seksual, usá komo arma pa gèngnan por kontrolá e habitantenan, a oumentá di forma drástiko den un luna di tempu”, segun O’Neill a señalá.
Mas aleu e eksperto a hasi un yamada riba outoridatnan haitiano, nombrá e aña’ki despues ku a baha e impopular gobièrnu di Ariel Henry, pa “lucha kontra di korupshon i e mal gobièrnu” ku ta hasi e krísis humanitario te hasta mas pió.
