WILLEMSTAD. – Ayera durante un kaso di vários atrako, kaminda 3 hóben ta keda akusá di a kometé atrakonan, e akusado prinsipal a trese un historia basta tristu dilanti. E hóben akusado Petronilia huntu ku  dos otro a tira atrako riba dos trùk di limonada den ménos ku 10 dia.

Petronilia ayera a konta hues kiko ta e motibu, ku el a kuminsá tira atrako. Segun Petronilia, na kas su situashon tabata hopi fèrfelu i kosnan no tabata kanando bon fo’i 2010 te ku 2021. El a bisa ku e tabata pasa den situashonnan hopi malu i asta bai tratamentu sikológiko. Hopi bia el a bai polis tambe, pero nunka nada no a bin afó. E no tabatin kama i tabata drumi riba suela.

Dado momento e mucha di 9 aña ku semper tabata keda ketu, a yega na 19 aña i dor di tur e situashonnan malu na kas, el a disidí di bai riba su mes. E no tabatin kaminda di bai i a opta pa drumi den su outo. El a sali kas un dia ku 400 florin. Dor ku e no tabatin kaminda di baña òf laba boka, el a disidí di bai serka Winklaar, pa a lo ménos laba boka. El a sigui konta ku e 400 florin ku el a sali kas kuné, a kaba den 2 siman. El a sali fo’i e situashon malu na kas i a drenta den mas problema.

El a konta ku riba un dia, el a wak un hende ta bende su kadena riba “vraag en aanbod”. El a bèl Winklaar i a bis’é pa nan bai hasi manera nan ta kumpra e kadena i asina hòrt’é ya nan ta haña sèn. El a atmití ku e ta esun ku a saka e machete riba e víktima i Winklaar a haña chèns di kore bai ku e kadena. El a bisa despues di un par di dia, nan no por a logra bende e kadena i no tabatin sèn pa nan kome. Esei a pone ku koriendo un mainta nan a mira e trùk di limonada i a bai di akuerdo huntu pa kometé atrako riba e trahadónan. Nan a blòkia e trùk di limonada, baha e trahadónan fo’i e trùk bou di menasa i kita nan pertenensianan.

Segun Petronilia, promé ku el a sali kas pa kometé su aktonan i bai riba su mes, e no tabatin niun hende pa konseh’é. E no tabata papia ku su mayornan i tampoko su rumannan. El a wòrdu lantá den un famia na drechi, ku no ta aprobá tipo di aktonan asin’aki. E tambe tin masha rabia riba hende ku ta tira atrako. E Loke nan ku el a pasa aden, no ta hustifiká ku e e mester a tira atrako riba hende inosente. El a bisa ku e ta konsiente di e trouma ku hendenan inosente por a keda kuné, pero na e momento na  ei, e no tabatin opshon.

Segun akusado, despues ku el a kai será, a bin hopi pidimentu di pordon den famia i asta nan tin kontakto ku otro. Dia e sali, e tin mag di bai biba bèk serka su famia. El a bisa ku e ke pidi pordon di su kurason na tur e víktimanan ku el a hasi daño. Despues ku el a kaba di papia, un miembro di famia a pidi pa bras’é i hues a bai di akuerdo.

E akusado Winklaar na su turno a konta ku será no ta dushi. El a bisa ta ora bo tin e unifòrm oraño bistí i bo ta tras di trali, bo ta realisá den kiko bo ta i kiko ba hasi. Segun e akusado e hòmbernan grandi ku ta sintando kastigu di hopi aña,  tur dia ta papia ku nan, splikando ku tiramentu di atrako i òf ladronisia ta algu hopi baho. Segun Winklaar, e ta rabiá ku su mes, pa motibu ku e no tabatin mester di tira atrako i hinka su kurpa den e problema aki.

 

 

LAGA UN KOMENTARIO

Please enter your comment!
Please enter your name here