WILLEMSTAD.- Situashon na Colombia ta hopi tristu despues di e temblor fuerte. “Loke tin akinan ta un desaster, literalmente post-apokalíptiko.” Asina David Jansen ta bisa Extra. Jansen, yu’i Kòrsou i empresario, tabata na Pereira djaluna 10 di ougùstùs. E parti wèst di e pais a keda sakudí pa un temblor di magnitut 7,4.
E kantidat di morto, komo konsekuensia di e temblor na Colombia, a subi na por lo ménos 265. Asina outoridatnan a bisa. Tambe mas ku 3.500 hende a keda heridá.
Pereira, ku ta situá den parti wèst di e pais, ta un di e siudatnan ku a sufri hopi daño. Míles di kas i edifisionan a sufri daño òf a keda kompletamente destruí komo konsekuensia di e temblor. Entre otro, hospitalnan i otro fasilidatnan di kuido, skolnan, infrastruktura i aeropuerto a sufri daño.
Segun Jansen, ta posibel ku ainda tin hende bou di e restunan di piedra i blòki. El a opta pa traha komo boluntario. Extra a papia kuné djárason 12 di ougùstùs.
David Jansen: “Outoridatnan a pidi abitantenan pa mobilisá ménos posibel ku outo òf vehíkulo grandi ku por opstruí e pasashi di vehíkulonan di emergensia. Nan ta pidi, pa si bo no tin nada di hasi riba kaya, no sali kaya. No tin awa tur kaminda i gas tambe ta será den sierto área.”
Jansen a manda Extra diferente imágen for di e siudat, pero ta splika ku tin imágen ku e no por a saka, pasobra riba e imágen por mira hende morto ku pia mitar kologando for di muraya. Segun Jansen, ta hopi difísil pa un hende ‘realisá e kos akí’.
E ta splika ku na Pereira a registrá 83 hende morto, 59 edifisio a bai plat, 30 animal a keda reskatá i alrededor di 280 pa 290 hende a keda reskatá den dos dia te ainda.
Jansen ta na Pereira ku su kasá, ku tin famia den e siudat. “E famia ta bon, nos no tin pèrdida familiar, Danki Dios.” E ta splika ku: “Miéntras nos tabata kanando i mi a saka potrètnan, glas ta kai for di 10 meter haltu i kibra abou. Kiermen, te ainda ta hopi peligroso riba kaya.”
E ta splika ku su buelo ta pa bula dia 22 di ougùstùs. “Pero mi no ta wòri ku esei aworakí, mi ta enfoká riba yuda hende kaminda ku nos por. Wak, ami ta mira ku si ami tabata ‘trapped in those ruins’, mi lo ke un hende yuda mi, ku òf sin eksperensia, pero ‘get me out of there. So, that’s what we’re doing too’.”
