WILLEMSTAD. – Den total 26 persona djabièrnè último a keda heridá na Sürnam, despues ku un manifestashon kontra gobièrnu a sali kompletamente for di man. Algun di e manifestante a keda heridá dor di tiramentu dor di polis. Otro persona a keda heridá durante atake di manifestantenan riba edifisio di Parlamento i durante sakeo di negoshi den kapital Paramaribo.
Polis na Sürnam djabièrnè último a usa gas lakrimógeno kontra manifestantenan ku a kuminsá protestá kontra gobièrnu di presidente Santokhi. Na un dado momento manifestantenan a ataká parlamento di Sürnam. Manifestantenan tambe a purba pa drenta den edifisio di gabinete di presidente di Sürnam. Polis a sera diferente kaya. Na un dado momento a tira riba tayer di un trùk ku manifestantenan.
Den oranan di atardi a mèldu diferente kaso di sakeo na Paramaribo. A kibra bentananan i porta di negoshi i hòrta diferente artíkulonan. Komersiante den e último dianan a bisa prensa lokal ku hopi di nan tabatin hopi miedu durante sakeo ku a tuma lugá. Hopi komersiante te ainda tin miedu. Kantidat grandi di negoshi te ainda no a habri porta. Polis i ehérsito a kontrolá sentro di siudat di Paramaribo durante wikènt último. Turistanan ta haña konseho pa evitá sentro di siudat i keda leu for grupo grandi di hende.
Hopi persona na Sürnam ta hopi rabia ku gobièrnu. Siman pasá gobièrnu a oumentá preis di gasolin, gas i internèt. Segun manifestantenan presidente Chan Santokhi i vise-presidente Ronnie Brunswijk tin ku bai kas. E gobièrnu mes ta bisa ku no tin otro opshon pa oumentá impuesto, pasobra pais tin un debe di estado hopi grandi. Segun presidente Santokhi esaki ta un herensia di presidente Bouterse. Desi Boutserse tabata presidente entre 2010 i 2020.
