Sòldatnan di Guardia Nashonal Bolivariano ta drenta Internado Judicial na Barinas, Venezuela, kaminda a saka den kareda do 100 detenido femenino pa hiba nan pa un otro prizòn.
BARINAS, Venezuela (AFP).- Famianan di prezunan a reuní dilanti di un prizòn na Venezuela kaminda nan a denunsiá ku e prezunan ta kansá di e “torturanan” na man di un direktor nobo, destituí despues ku prezunan a tuma kontròl dje prizòn. Prizònnan na Venezuela ta opheto konstante di denunsianan pa kondishonnan di violensia, konfliktonan tantu entre prezunan komo tambe ku wardadónan di prezu i e kontròl di gruponan kriminal.
Desena di famianan ansioso tabata pará ayera atrobe dilanti di un prizòn na Barins, den un estado wèst dje pais. Na e momento ei un grupo di prezu tabata riba dak dje prizòn, kaminda for di djadumingu nan a tuma poder.
“E prezunan ta keda torturá i batí”, segun Maria Eugenia Duran, kasá di un hòmber prezu ya pa kuater aña.
E direktor dje prizòn, Elvis Macuare Guerrero, a keda destituí despues di lantamentu dje prezunan.
Segun e organisashon di derechinan humano Observatorio Venezolano de Prisiones, for di momento ku Macuare a asumí funshon un siman pasá, e prezunan a bira víktima di “gòlpi i tortura”. Tambe a destruí pertenensianan ku e prezunan tabatin den nan sèlnan.
