WILLEMSTAD. – Tin un situashon tenso den prizon na e momentunan aki. Awe mardugá tempran EXTRA ta haña notifikashon ku situashon ta tenso no solamente pa prezunan, pero pa personal tambe. Ayera djadumingu tur kos a bai robes i tur hende tabata teme pa lo peor ayera. EXTRA a komprondé ku e informe ku ta sigui aki a bai pa e sindikalistanan Bremer i Wilson tur dos di ABVO.
For di nos fuente t’asina ku wardadónan di prezu tabata sera blòk 7 ku un “drone” ta kai den e sekshin djis pegá kaminda ku e wardadonan di orezu tabata laborando. A duna òrdu pa listra e blòk. E “drone” a laga kos kai tras blòk 8 i ora bai kontrolá a haña pakete ku hopi droga i 2 selular. A interseptá telefon den sèlnan i tambe “moonshine” i 2 opheto skerpi i droga den djùk di te.
Ayera trabou tabata trubel, problema ku kuminda pa detenido. No tin nada di kome den kushina. Nan a manda un pòkchòp stobá pa kome ku pan. Detenidonan a mand’é bèk, pa motibu ku e pòkchòp tabata bombá. Mester a manda kuerpo spesial pa manda e prezunan di blòk 7 bai den nan sèl, pa motibu ku nan no tabata ke a drenta den nan sèl. Un empleado a disidí di hasa webu pa e prezunan por kome, esaki ta pa evitá ku mester a usa forsa pa nan bai den nan sèl.
Situashon di kushina i skarsedat di material di limpiesa ta kaótiko ke men no tin kosnan di nesesidat básiko pa detenidonan.
E fuente ta splika ku e situashon aki ke skonde pa pueblo i purba sera boka di esnan ku ta papia i habri boka ku e lugá ta deteriorando i e kosnan aki ta birando un bòm di tempu i e situashon aki ta bira dia pa dia hopi peligroso pa e trahadó nan komo pa prezu nan mes.
Segun e fuente, gobièrnu no por manehá a situashon aki i tur dia ta laga aparentá k tur kos ta bou di kòntròl, kaminda ku e situashon ta kaótiko i eksplosivo.
Detayenan amplio ta sigui den EXTRA mayan mainta.
