Na e diferente siudatnan franses a tuma lugá akshonnan pisá ku siudadanonan ekspresando nan malestar sosial e.o. relashoná ku oumento di kosto di bida.
PARIS, Fransia (AFP).- Pushá den un huki pa un debe públiko rèkert i esaki faltando algun luna pa elekshon presidensial, gobièrnu franses ayera a presentá un proyekto di presupuesto pa 2027 ku ta intenshoná pa kondusí na un ahuste fiskal di 54.000 mion euro. E finansa públiko di Fransia, ku un nivel di debe rèkert i un défisit riba límitenan marká pa Union Europeo, ta e tema sentral di e elekshonnan presidensial di otro aña.
Gobièrnu dje promé minister Sebastie Lecorne, ta enfrentá un reto di logra e aprobashon di e sifranan pa 2027 na momento ku tin un kresiente malestar sosial pa e oumento di kosto di bida. Ta bini aserka e guera entre Merka i Iran ta sigui pusha preis di kombustibel i manda esaki haltu.
E movementu sosial a kue forsa ku protestanan nobo di studiantenan pa falta di rekursonan pa edukashon. Mas ku 160- skol a keda será i studiantenan universitario a djòin e mobilisashon den Paris, Marseille i otro siudatnan.
Studiantenan a lanta barikadanan i a sende barínan di sushi na kandela den Stratsburgh, Toulouse, Nante i Lille, mientras ku outoridatnan a denunsia agreshonnan i intimidashon kontra di direktornan di sentronan di edukashon.
Gobièrnu a kalifiká e insidentenan komo “violensia urbano” i e promé minister a hasi yamada riba miembronan di su gabinete pa posponé nan biahenan rònt e pais.
Ministerio di Interior a informá di 1.949 detenshon durante dje protestanan. Djamars último, mas ku 200.000 persona a tuma parti na e manifestashonnan di sektor públiko kontra e desishon di gobièrnu pa konhelá e índise ku ta usa pa kalkulá parti di salario dje funshonarionan.
