CARACAS, VENEZUELA (AFP).- Míles di opositor ayera a subi kayanan di Venezuela gritando “Libertat!” i ta grita pa viktoria di e kandidato Edmundo Gonzalez Urrutia den elekshon presidensial di djadumingu último. Miéntras tantu, a menshoná kantidat di 12 morto i algun shen persona kendenan a keda detené.
Ku e gritu di “Libertat, libertat!”, simpatisantenan di Gonzalez Urrutia i dje lider opositor Maria Corina Machado a konsentrá den Caracas i otro siudatnan venezolano pa reklamá riba e resultadonan dje elekshon presidensial di djadumingu último, ku segun Konseho Nashonal Elektoral a otorgá un di tres mandato pa e iskierdista Maduro.
“Nos mester keda riba kaya, no por permití ku dje manera ei nan ta hòrta nos votonan. E kos aki mester kambia”, segun Carley Peatiño (47).
Liderá pa Maria Corina Machado, oposishon ta bisa di tin pruebanan pa demostrá su triunfo, miéntras ku komunidat internashonal ta preshoná pa un konteo nobo di votonan.
Den e konsentrashon na Caracas, Gonzalez Urrutia a yama Forsanan Armá pa kalma despues ku a registrá por lo ménos 11 sivil kendenan a pèrdè nan bida durante di protestanan, ku desena di heridonan riba kaya.
“Señornan di Forsanan Armá, no tin tantu motibu pa reprimí e pueblo di Venezuela, no tin un motibu pa tantu persekushon”, segun e rival di Maduro den elekshon a bisa.
Di su parti, e presidente venezolano a responsabilisá Gonzalez Urrutia i Machado pa e violensia den e manifestashonnan i a sigurá ku “hustisia lo yega”.
“Senor Gonzalez Urrutia, mi ta pone bo responsabel pa tur loke ta pasando den Venezuela, di violensia kriminal, di delinkuentenan, di heridonan, esnan ku a pèrdè nan bida, dje destrukshon”, segun Maduro a bisa ayera for di palasio presidensial di Miraflores.
White House ta konsiderá komo inaseptabel e represhon di manifestashonnan, loke a laga desena di hende heridá, miéntras ku e alto komisario di Nashonnan Uní pa Derechinan Humano, Volker Türk, i e hefe di diplomasia di Union Europeo, Josep Borrell, a hasi un yamada pa respetá e protesta pasífiko di opositornan.
E organisashon di defensa di derechinan humano Foro Penal, a menshoná e kantidat di sigur 22 sivil kendenan a muri durante dje protestanan, entre nan dos menor di edat.
E fiskal general, Tarek William Saab, na su turno a menshoná morto di un militar i a anunsiá detenshon di 749 persona.
Segun e minister di Defensa, general Vladimir Padrino, kende a uni su mes na bisa ku tin gòlpi di estado kontra di gobièrnu, t’asina ku Forsa Armá ta ekspresá su “lealtat apsoluto i apoyo inkondishonal” na Maduro.
Miéntras tantu, Machado a bisa di tin den su poder kopia di 84% di aktanan di votashon ku ta proba supuesto froude, i a proyektá un viktoria di Gonzalez ku 6.27 mion voto kontra di 2.75 mion di Maduro.
