Attaf ta premirá
WILLEMSTAD.- Lo tin un skarsedat di klapchi fin di aña aki na Kòrsou. Asina un di e importadónan mas grandi di klapchi, Sabir Attaf ta konfirmá pa EXTRA.
E motibu prinsipal ta problemanan logístiko, Attaf ta indiká. E ta propietario di e kompania Alivio ku ta spesialisá entre otro den artíkulonan pa fin di aña manera palu di Pasku, dekorashon pa Pasku i tambe klapchi pa kambio di aña.
E ta splika ku un di e motibunan prinsipal ta e haf di Jamaica. Barkunan grandi for di China no ta bishitá portanan venezolano mas. Konsekuentemente nan ta desviá pa e haf na Jamaica kaminda e fluho di tráfiko den kònteiner ta oumentá.
Ta bin aserka ku, segun EXTRA a komprondé di sektor marítimo ku haf di Jamaica ku ta funshoná komo un hub pa diferente isla den Karibe a yega na su kapasidat máksimo pa aloká kònteinernan di klapchi. Esaki ta enserá ku barkunan ku ta transportá klapchi no por deskargá na e porta.
Te ora ku Jamaica habri su haf atrobe pa e tipo di karganan aki ya ta na luna di novèmber loke segun Attaf ta muchu lat pa Kòrsou logra haña kònteinernan di klapchi na tempu. Tambe e ta mustra ku aworakí ta tur haf rònt mundu ta drùk. “E kònteinernan aki lo yega Kòrsou te na yanüari. Ken ta bai pidi klapchi pa seguidamente mester warda nan pa bende despues. Ta hopi sèn ta keda para morto asina.”
Un otro problema ku Attaf a señalá ta e pèrmitnan ku gobièrnu ta duna pa importá klapchi ku na su opinion ta sali muchu lat. Tumando tur e puntonan aki na konsiderashon e propietario di Alivio ta bisa ku e ta kere ku lo tin skarsedat serio di klapchi fin di aña aki. “Mi no sa di otro importadónan, pero segun mi tur ta den mesun situashon i buska klapchi for di otro destinashon tampoko ta bai logra.”
Loke ta bai bende na klapchi riba merkado lokal ta prinsipalmente loke a sobra di importashon di aña pasá. Esaki ta konta pa tur tipo di klapchi inkluso pagaranan ku tambe lo tin skarsedat di dje. Esta Attaf.
Palu di Pasku
Pa loke ta Palu di Pasku e propietario di Alivio no ta premirá problema. E palunan aki ta bini di Canada, pues via di un otro ruta i portanan marítimo. Ku e wèlga bou di guia di e sindikato ILA (“International Longshoremen’s Association”) den portanan marítimo na Merka, prinsipalmente na kosta ost i kosta di Golfo i ku a inisiá for di promé di òktober, a teme ku lo tin problema tambe ku entrega di Palu di Pasku e fin di aña aki. ILA ta representá alrededor di 45 mil trahadó den haf i ta eksigí un oumento salarial di 85 porshento plùs garantia di trabou pa trahadónan.
Dos dia despues sinembargo ILA a suspendé e wèlga te yanüari awor, pasobra a surgi un apertura den e negosiashonnan. Tin un akuerdo tentativo riba mesa riba oumento di salario. Tur trahadó ta bai bèk trabou te ku 15 yanüari momento ku partidonan bolbe bai mesa pa kaba di negoshá riba tur otro asuntu lòs for di oumento di salario.
Foto:
…Skarsedat di klapchi…
