Mientras ku Aqualectra tin problema pa kumpli ku demanda
WILLEMSTAD.- Temporada di kalor a kuminsá i mesora Aqualectra a konfrontá problema ku kapasidat. Ta bin aserka ku e siman aki, riba djaweps 20 di ougùstùs, skol ta habri pa tur alumno na Kòrsou. Último 3 pa 4 aña Direktiva di Skolnan Katóliko (RKCS) ta tende di vários trahadó den enseñansa ku nan ta ku nan ta sinti kalor durante e temporada aki. Direktor, Royla Pierre ta indiká ku ta dependé tambe di unda e skol ta situá ku ta determiná kuantu kalor ta hasi. Si e skol ta nèt tras di sierto edifisio kaminda ta stroba fluho di bientu ta reklamá e kalor mas tantu. Na Bándabou por ehèmpel skolnan ta rondó mas pa naturalesa i tin un tiki ménos molèster.
E direktor ta bisa den e podcast 3’or ku Gino, ku RKCS a traha último tempu hopi duru riba su propio maneho pa sòru ku skolnan tin èrko. Un maneho ku mester ta duradero, pasobra kumpra e èrko no ta tur kos. Mester instalá esaki, sigurá e èrko kontra ladronisia i tambe sòru ku e sistema eléktriko di e skol por karga ku e demanda.
E último punto aki segun Pierre ta algu ku a balotá. Tin skolnan ku ta eksistí 90 aña kaba i no a konstruí e skol pa uso di hopi aparato di koriente manera kòmpiuter, laptop i èrko Aparatonan ku ta pone hopi preshon riba e sistema di koriente. Nunka no a kambia e sistema di koriente di e skolnan tampoko.
Pa e motibu aki mester drecha e sistema di koriente di skolnan, promé ku por instalá èrko. Esaki ta trese gastunan enorme kuné pa RKCS, Pierre ta indiká. No ta gastunan ku e direktiva di skol ta haña kompensashon pe tampoko, pues e mester buska otro maneranan pa kubri e gastunan.
Komishonnan di mayor di e skolnan tambe ta yuda. “Mi ta hopi kontentu ku tin komishon di mayor. Nos ta haña hopi bon koperashon tambe di komèrsio. Tin hopi komersiante ku a hasi donashon na skolnan.”
Pierre ta mustra ku MIL (Maria Immaculata Lyceum) a haña bon koperashon di komèrsio i ta ful na èrko, meskos ku St. Franciscus College tambe ful ku èrko. E ta bisa ku a logra pone èrko na bastante skol, pero no ta na tur skol ta ful ekipá pasobra tin ku drecha e sistemanan di koriente promé. “Kompará ku 1 i 2 aña pasá sinembargo tin hopi mas tantu skol tin èrko.”
Ta bai sigui traha te ora kana yega ku tur skol ta ful na èrko. Tur skol ku a renobá den kuadro di e finansiamentu ku a haña for di Hulanda tambe ta ful na èrko. Un di e skolnan aki ta Kolegio Mgr. Wim Ellis na Otrobanda. Tambe Vigdis Jonckheer-Mensing College ta bai habri atrobe na su propio edifisio e aña eskolar aki. i einan ta instalando èrko.
Na St. Paulus College, skol di fundeshi, tambe ta hasiendo renobashon. E skol tin 3 edifisio. Un di e edifisionan ta ful renobá, i ora kaba renobá tur edifisio lo instalá èrko na e skol tambe.
Loke RKCS ta bai traha alabes riba dje ta pa krea mas espasio ku tin sombra den kurá di skol. Hopi kurá di skol ta asfaltá loke tambe ta kousa di hopi kayente i kalor. Ta bai planta mas palu pa asina esakinan den futuro duna mas sombra, prinsipalmente den pousa i ora ku skol kaba. “Mester di muchu mas bèrdè”, Pierre ta finalisá bisando.
