WILLEMSTAD.-Gobièrnu di Kòrsou a duna informashon adishonal awe riba e medidanan ku a anunsiá ayera, spesialmente pa loke ta trata sektor di enseñansa. Minister di Enseñansa Steven Croes a anunsiá awe ku despues di deliberá profundo ku tur partido embolbí a yega na e desishon ku skolnan ta keda habrí e siman aki.
E minister a bisa ku e ta konsiente di inkietut serka dosentenan, mayornan i asta hóbennan,. El a enfatisá ku pa e salubridat di dosentenan i alumnonan ta hopi importante. Manera indiká ya kaba e ta den kontakto kontinuo direktivanan di skol, sindikato i alumnonan.
E desishon ta ku skol di fundeshi i skol avansá ta keda habrí e siman aki pasobra skolnan no ta fuente di kontagio. No tin motibu médiko pa sera skolnan. Ademas den ‘lockdown’ aña pasá a surgi hopi problema ku atraso den enseñansa i e minister i otro gruponan di interes no ke pa esei sosodé atrobe. Mester hasi tur esfuerso pa limitá mas retraso den enseñansa.
Ta importante pa skolnan keda habrí e siman aki i pa durante di e tempu aki dosentenan i alumnonan prepará mas tantu posibel pasobra e minister tin miedu ku situashon di kontagio lo por bira muchu mas tantu, te ku Kòrsou lo mester bai den ‘lockdown’ total. Mas detaye den edishon di EXTRA.
