Winnerchild ta duna guia na muchanan ku a keda pegá den nan desaroyo; muchanan tentá, muchanan insigur, muchanan ku no por sinta trankil i problema ku konsentrashon. Nos ta yuda nan, guia nan pa nan por usa nan kualidatnan.
Wendell a sigui ‘opleiding’ di Kindercoach i banda di su trabou el a kuminsa den wikènt guia muchanan ku problema. Na skol e tabata ripará ku hopi mucha ta bin skol ku strès, muchanan ku problema di motivashon i konsentrashon i via di e lès aki a siña kon ta guia e mucha pa e por bin skol mas kontentu, ménos stress sigur i mas ku tur kos ku konsentrashon.
Yudansa pa un periodo….
Promé di a bai e kurso di Guia pa Mucha, Wendell Isidora ku ta kabes di Divi Divi School tabata implementá e guia aki na skol pero mirando e kantidat di kasonan el a disidí di bai yuda mas mucha ainda ku mester di e guia aki i asina el a kuminsá guia mucha den wikènt.
E diferensia entre un guia pa mucha i un sikólogo ta ku e sikólogo ta bai mas profundo i e guia di mucha ta un yudansa pa un periodo kòrtiku di algun sekshon pa e mucha por usa su kualidatnan mihó i asina sigui ku su bida.
Dikon strès…
Mucha por haña strès dor di diferente kos. Wendell a splika ku e mayor ta eksihí demasiado di e muchanan, sin tende mihó di nan. Ta eksihí pa e mucha ta mihó den deporte, na skol, pa e por skor puntonan di mas haltu, e kantidat di hùiswèrk ku nan ta haña. Ta hopi kos ta duna e mucha strès. Ora tende strès por kere ku e mucha ta trata meskos ku hende grandi, esta e ta haña nèrvio ora e tin strès. Pero serka e mucha esaki ta desaroyá den otro forma. Serka e kriatura ku tin strès, su motivashon ta baha, e mucha ta bira hopi drùk, e mucha su konsentrashon ta tur esaki ta pone ku ta bai stèmpel e mucha komo ADHD i ADD. Pero ta e preshon riba e mucha ta pone ku e no por konsentrá i ta bira inkieto.
Strès for di kas….
E strès di e mucha hopi biaha ta bini di kas. I p’esei segun Wendell, e ta kuminsá den su sekshonnan di guia pa mucha ku invitá e mayornan pa tende di dje kon e ta eksperensia e mucha, su preokupashon i despues konsentrá riba e mucha. “Mi ta tuma e mucha hopi na serio, kiko ta su preokupashon, kiko ta e kos ku e ta sinti ku por kambia i huntu ku e mucha hasi sierto ehersisio pa wak su kualidatnan i ku e kualidatnan aki kita e preshon òf e problema ku e ta sintá kuné”, Wendell a bisa.
Muchu tarea na kas….
Pa loke ta hùiswèrk/tarea di kas, Wendell a bisa ku esaki ta un problema ku nos ta sinta kuné aki na Kòrsou. Hopi biaha ta duna e muchanan demasiado hùiswèrk i e tin gana di mir’é kambia. Pero e no por trese e kambio den skol. Loke si e ta hasi durante di e guianan na e mucha ta siña esaki kon e por dil ku e hùiswèrk, pa e no hañ’é ku problema den klas i pa e por sintié mas trankil.
Ta eksihí demasiado di e mucha…
Nos por eksperensiá ku hopi bia e mayor ta eksihí di e yu ku e tin di logra e skol di mas haltu despues di skol di fundeshi ku ta Havo. Wendell a ripará ku mayoria mayor ke esei pa nan yunan. Por mira ku for di den grupo 6 ta kuminsá pone e yu ta Efo training pasobra den grupo 8 e mucha mester bai Havo. Pasobra ta Havo nos konosé komo esun ku ta konta. I pa konta ta Havo e yu mester bai, esei ta e persepshon i kerensia ku hopi biaha un mayor tin. Pero segun Wendell, si e mayor skucha e mucha, mayoria biaha nan sa kiko nan ke i no nesesariamente nan mester bai Havo pa logra nan meta. E mucha por logra su meta dor di bai AGO, VSBO. No ta ku Havo so ta logra e meta. I den komunidat no ta dòkter so tin, pero mester di e mekániko, lotgiter, diferente persona i fishi mester. Nos mester siña apresiá nos yunan i konsentrá riba felisidat di nos yunan. No ta e Havo ta loke ta hasi e mucha felis. Tin e amor i kariño i atenshon ku e mucha mester pa e ta felis.
Proseso di guia…
E proseso di guia di mucha ta dependé segun Wendell di e mucha i e preokupashon. Si wak den kasonan di divorsio, kon e divorsio a bai i kon e mucha a eksperensiá i kisas den 2 luna e mucha a pasa over di dje kaba. Pero tin mucha ku banda di e 5 sekshonnan, nan mester di mas sekshon. Tin mucha ta mas sensibel i ta keda mas largu den e guia. Ora e mucha kaba ku e sekshonnan di guia di mucha, por sosodé ku e mayor mes ta aserka e guia si e mira ku e tin mester di poko mas yudansa ku e mucha.
Tentamentu….
Tentamentu no ta sòru pa hopi strès pero e ta bin dor di muchanan ku no ta sinti nan mes sigur di nan mes. E mucha ku ta tenta ta sintié mas poderoso i ta sigui tenta pasobra e ta ripará e otro ta yora òf rabia lihé. Siña un mucha pa e apresiá su mes mas i asina e ta ménos vulnerabel pa e tentamentu, di otro banda esun ku ta tent’é tambe ta ripará ku e no ta hañando e atenshon ku e tabata haña i outomátikamente e ta stòp. E mucha ku ta tenta tambe ta dor ku e no ta haña e amor i atenshon i ta debil, e ta bai tenta pa asina niun hende yega serka di dje. Pero si e deskubrí ku bo mag di hasi fout i bo por ta debil sierto momentu. E tin di siña apresiá e partinan ei i asina e no tin e nesesidat mas pa tenta.
Ta masha importante pa kada mucha ta un ganadó, un Winner Child. Wendell a splika riba e punto aki ku ta importante pa nos mucha ta felis pasobra nan ta presta i ekselá mihó. Aki na Kòrsou nos ke hende felis i hende felis ta kuminsá na mucha felis.
Winner child…
Winner child ta eksistí pa 6 luna kaba riba su mes pero komo kabes di DiviDivi school mester Wendell Isidora ta praktik’é algun aña kaba. I el a ripará ku trahando na e skol aki el a ripará ku e reakshon di mayornan ta ku e skol ta otro, e skol tin un trankilidat, e muchanan ta kana mas felis rònt. Nan ta pone atenshon na hùiswèrk pero no e kantidat ta konta pero e kalidat. Un ora máksimo na hùiswèrk ta pone nan ta pone énfasis riba dje. Na skol mes tambe tur mainta e muchanan ta bebe te i por ripará ku e muchanan ta mas trankil. Guia pa mucha ta bai te ku mucha di 15 i asta 17 aña, segun Wendell a konta Djasabra. E no ta pa skol di fundeshi so pero skol sekundario kaminda tin hopi Peer pressure.
Por tuma kontakto 515-2479 òf por app i asina haña kontakto ku Wendell Isidora.
Kombersá ku bo yu, skuch’é i sera konosí mihó kuné…
Na final di e aña eskolar aki, mirando e simannan di fakansi nos dilanti Wendell Isidora a bisa ku kombersá mas ku nan yunan, skucha e mucha i sera konosí mihó ku e mucha. Si e wak e muchanan ku e ta haña ta bin di mayornan ku a separá, muchanan tentá i inkieto. Si dediká mas tempu na e parti ei i si e mayornan no ta bai bon ku otro komo pareha, envolví e mucha. No tene e mucha afó pasobra un mucha indirektamente ta sinti kos den kas ounke kuantu e mayornan tapa kos. Splika e mucha i asina e por dil mihó ku kualke problema. Loke e muchanan di awendia mester ta splikashon. Nan tin hamber na splikashon i asina nan ta mas trankil.
Ta dor ku e mucha no sa e mes ta bai inventá i ta intrankil.
Na nos muchanan keda manera bosnan ta, Dios a traha nos manera nos ta i nos mester ta felis. I na mayornan pone atenshon na nos muchanan pa nan ta muchanan ganadó.
