CARMEN DE ATRATO, COLOMBIA (AFP).- Ku kachónan entrená, sòldánan tabata buska 10 hende ku a disparsé den un skùifmentu di tera ku a mata 33 persona i a provoká 20 hende heridá den un komunidat indígena den nortwèst di Colombia.
“Na tur e famianan dje víktimanan, mi sentido pésame… Nos ta spera di haña mas hende ku a disparsé i ohalá nan no ta morto”, segun e presidente Gustavo Petro den e munisipio di Carmen di Atrato, kaminda e skùifmentu di tera a tuma lugá.
E trahadónan di reskate den oranan di anochi a wanta ku nan trabou pa motibu di riesgo di skùifmentu nobo di tera den e region pegá na Pasífiko, kaminda tin un dje selvanan ku mas áwaseru na mundu.
Mas di 200 persona entre bombero, reskatistanan, militarnan i indígenanan a traha kontra di oloshi, miéntras ku famianan di esnan ku a disparsé ta spera riba notisia. “Nos mester sa algu di mi sobrino pasobra nos no a tende nada, ni di bibu ni morto”, segun Clara Estarda a duna di konosé.
Imágennan riba retnan sosial i na kanalnan di televishon ta mustra momento ku un parti hopi grandi di seru a basha bin abou i a tapa un fila di outo, lagando e kaminda partí den dos.
“E posibilidat di mas derumbe ta presente. Tabatin dos dia di solo, e riesgo ta ménos, pero asina áwaseru kuminsá kai tur e personanan den aktividat i esnan ku t’aki lo ta den peliger”, segun e presidente Petro.
