WILLEMSTAD.-Informashon ku EXTRA ta dispone di dje ta indiká ku e kompania di aviashon di Sürnam, SLM, a konfrontá un poko problema i ku kasi e no a haña pèrmit pa baha awe nochi na Kòrsou. Pasaheronan ku EXTRA tin kontakto kuné a bati alarma despues ku SLM su orario a kambia na algun okashon, sin muchu splikashon. Un ratu pasá a drenta e informashon ku SLM lo yega Kòrsou kasi 12’or di anochi for di Miami, pa despues mesora pa Sürnam.
Buskando mas informashon riba e kaso EXTRA a papia ku pasaheronan ku a konfirmá ku siman pasá e buelo di djabièrnè pasá, ku tabata programá pa sali Kòrsou 11:45pm pa Sürnam, a sali despues di 2’or di mardugá. Esaki ta debí ku e mesun avion aki di SLM mester a bai Miami, kaba pa e bini bek Kòrsou i bai ku e pasaheronan Sürnam. Mester bisa aserka ku e mesun avion mas o ménos 7’or anochi a bai Miami pa buska pasaheronan, asina a informá na aeropuerto.
Komo konsekuensia di esaki e pasaheronan ku mester bai Sürnam a yega nan destino den oranan di mainta.
No ta kustumber pa atendé buelonan den oranan di anochi lat. Den vários otro pais si ta normal ku aviashon ta sigui operá 24 ora pa dia. Kòrsou ta diferente den e sentido ei kompará ku otro paisnan unda ku si aviashon ta sigui realmente 24 ora pa dia.
