LIUBLIANA, Slovenia (AFP).- Gobièrnu di Slovenia a anunsiá di lo prohibí entrada den su teritorio na dos minister israelí di ekstremo derecha, un inisiativa presentá komo “un primisia den Union Europeo”.
Itamar Ben Gvir (Seguridat Nashonal) i Bezalel Smotrich (Finansa), sosionan den e koalishon gubernamental liderá pa e promé minister Benjamin Netanyahu, lo keda deklará “persona non grate” pa nan “deklarashon genosidio, ku ta duna aliento na un violensia ekstremo i violashon grave di derechinan humano di palestinonan”, segun un komunikado.
Tur dos funshonario ta partidario pa amplia e kolonianan hudiu den Cisjordania i ta fomentá einan e “limpiesa étniko”, meskos ku den strook di Gaza, segun e gobièrnu sentrista.
“Ta e promé medida dje tipo aki den Union Europeo, den sierto sentido nos ta e pioneronan”, segun e kansier Tanja Fajon. Pero tambe el a referí na e echo ku “otro paisnan pafó dje kontinente a imponé prohibishonnan di biahe na e dos ministernan”.
“Nos ta mandando un mensahe bon kla na e gobièrnu israelí di ku e masakre di sivilnan inosente mester kaba”, segun el a bisa.
Den luna di yüni, Reino Uní, Australia, Canada, New Zealand i Noruega a anunsiá sanshonnan kontra e dos ministernan ku awor tin prohibishon pa biaha pa e paisnan ei, un medida ku Merka a kondená.
Preshon internashonal riba Israel pa su ofensiva den Gaza a bin ta krese e último lunanan, pero Slovenia tin basta tempu ta kondensá e konflikto.
Su presidente, Natasa Pirc Musar, den luna di mei a denunsiá dilanti di Parlamento Europeo e genosidio i aña pasá e pais a rekonosé e Estado Palestino, uniendo su mes na Irlanda, Spaña i
Noruega.
