SOAB 25 aña (stichting Overheid Accountants bureau)

 

Geomaly Martes director general

Raymond Faneyte Associate Director Finance

Hardy Huisden Associate Director Operations

 

SOAB a lanta 25 aña pasá i a originá despues ku tabatin e tempu ei teritorio insular di Kòrsou tabatin su kantor di akountent i gobièrnu sentral tambe di dje i tabatin basta diskushon kon por drecha e funshonamentu. A opta e tempu ei pa forma un fundashon i pone e dos servisionan ei huntu i hasié aksesibel pa e otro islanan. Tabata un deseo e tempu ei di minister Gilbert de Paula di finansa i el a bin ku e idea pa purba bin ku algu mas sólido pa yuda gobièrnunan mas mihó den kòntròl i konsehonan.

 

Kòntròl, konseho i sosten

E trabou prinsipal ta keda esun di kòntròl di relatonan anual. Gobièrnu ta duna supsidio i ei tambe ta hasi kòntròl. Tambe SOAB ta duna konseho na gobièrnu riba base amplio. Konsehonan finansiero, konsehonan den organisashonnan, kon pa lanta esaki, ta algu basta amplio. I último ayanan e parti di teknologia ku ta drentando gobièrnu, tambe ouditá i ta duna sosten. Tin bia mester yuda pa implementá sierto kos.  Nan tin di paga tinu pa no hasi algu ku nan tin di kontrolá nan mes. Nan ta duna e sosten di tal manera ku esun ku ta hañando e konseho ta e direktor ta keda esun responsabel. Por ehèmpel e OZB ku a introdusí SOAB a yuda den registrashon di kasnan, hopi taksashon, esei ta un sosten pa logra sierto metanan.

 

SOAB 3 bia mas grandi

Despues di 25 aña por papia di muchu mas trabou. SOAB a kuminsá na 1994 ku 22 hende ku sierto kantidat di trabou i presupuesto chikí i awe tin riba 70 hende, tin ofisina na Kòrsou i St. Maarten i di mes e presupuesto tambe a amplia. E trabounan a bira mas tantu pero mas variá. E tipo di profeshonalnan ku tin ta mas variá den estudio ku nan a hasi i eksperensia ku nan tin kompará ku 25 aña pasá. Antes tabata mas finansiero i awor e parti pa ta mas efisiente ta usa ménos ora pa un trabou di kòntròl pero na su lugá a bin hopi trabou di konseho, un base amplio i sosten. Tambe tin mas petishon riba e arianan ei pa yuda.

 

Semper na serio

Raymond Faneyte a splika ku SOAB ta keda tuma na serio na momentu ku nan hasi un trabou. “Semper” manera el a enfatisá. E ta kere loke ta hunga un ròl den transkurso di añanan ta e investigashonnan ku SOAB a yega di hasi na diferente kompania di gobièrnu, riba tereno di froude i operation audit a duna e fundashon un tipo di reputashon di ta serio i tin ora kosnan ta sali na kla ku no ta loke gobièrnu kier a skucha òf tende pero nan tin reputashon di ta trese  e kosnan dilanti manera el a sosodé. I p’esei no tur ora nan ta kai den bon tera serka sierto nan pero esei ta algu ku nan ta para pe. Ta tuma nan na serio pasobra ora minister bisa ku ta laga SOAB hasi investigashon, niun hende ta duda i ta warda e resultado. I den reunionnan di Staten por skucha e nòmber di SOAB ta zona i esei ta nifiká ku ta tuma nan na serio i e ta duna nan satisfakshon komo profeshonal den nan trabou i ta un motivashon. Den e área aki mas haltu bo bai, mas importante e investigashon ta, bo ta haña e krítika i esei ta algu ku den transkurso di tempu nan a siña dil kuné.

 

 

No ta semper fásil

Hardy Huisden a splika ku no semper ta asina fásil pa hasi e investigashonnan i tin biaha nan tin di trèk pa por haña e informashonnan nesesario. No semper e ta na interes di esun ku ta duna e enkargo pa duna e informashonnan rápido. E ta kosta tempu pero e hendenan di SOAB ta bon di train i si no ta logra ta buska e yudansa interno pa tòg yuda pa nan por keda kla. Eigenlijk e hende ta obligá na duna e informashonnan pero no semper e ta bai asina lihé i sigur no den e tempu ku nan di SOAB ke.

I na momentu ku nenga na duna nan e informashonnan segun Geomaly a splika, nan ta bira hopi formal pasobra nan trabou ta reglá den lei. No ta kiko ku ta i den lei tin pará ku nan tin akseso na henter atministrashon di gobièrnu i esei ta tur dokumento. I si no haña kooperashon nan ta bai bèk na esun ku a duna enkargo i ta mustra esun ku ta nenga e informashon nan ta mustr’é ku e ta hasiendo algu kontra di lei.

 

Ni karni ni piská

Loke por tende hopi den komentarionan riba SOAB ta “Nan no ta karni ni piská”, Geomaly a bisa ku tin bia e tin di aber ku e hende no ta kontentu ku loke SOAB a reportá pasobra no a sali afó loke e hende ke tende. Pero e otro punto ta ku tin bia esun ku a duna e enkargo ke pa nan bai mas leu. E komo SOAB no por bisa ku hende a kometé froude pero ta papia di indikashonnan. Kondená un hende pa froude ta hues ta hasié i tin hende ke pa SOAB bai asina leu. Pero nan no ta husga pero nan konstatá. Tin bia nan  por konsehá pa hasi un keho tambe pero SOAB no por bai mas leu ku esei. Tin kos ku maske nan tin nan pensamentu nan no por probe. I dado momentu nan topa ku e tipo di komentarionan ku hende no ta di akuerdo, SOAB ta splika su reglanan i ku sigur no ta violá e lei di sekresia. I p’esei for di prinsipio di kualke investigashon SOAB ta pone bon kla kiko a pidié i kiko e ta bai hasi. I loke e reportá ta bira responsabilidat di esun ku duna e enkargo. Pero ta un echo ku tin hende no ta gusta karga e responsabilidat ei pero lo preferá laga e kos den skochi di SOAB.

 

Derechi eksistensia

Despues di 25 aña di eksistensia e direktornan ta mas ku konvensí ku SOAB tin derechi di eksistensia. Nan ta un instrumento pa gobernashon. For di un ròl imparsial i independiente por hasi investigashon i duna konseho. E konseho ta basa riba profeshonal i no loke e hende ke tende. Tur organisashon grandi i serio tin su entidat pa kontrolá pasobra e minister, sekretario general no tin wowo, bista ni tempu i tampoko preparashon pa hasi e investigashonnan pero tin di responsabilisá si na parlamento i p’esei SOAB tei pa yuda den e kòntròlnan.

 

SOAB no ta ripití loke e polítiko ke tende

Raymond a splika ku nan área di operashon ta sektor públiko esta no gobièrnu so, pero NV i fundashonnan. Mas di 80% di ekonomia di Kòrsou tin di aber ku e sektor públiko. Komo e órgano profeshonal di akountent i konseho pa gobernashon ta nan ta asesorá gobièrnu den tur investigashon, ouditorio i konseho i tambe sosten pa loke no ta solamente e ministerionan di gobièrnu pero tambe tur fundashon i NV na di gobièrnu. Nan ta apuntá pa lei pero komo e organisashon ta spesialisá riba sektor públiko, nan tin un rason di eksistí. I SOAB ta hasi trabou na Aruba, Boneiru, St. Maarten i tambe Sürnam. I p’esei mes e kresementu di SOAB di 22 pa 70 profeshonal i tambe e tipo di trabou ta kambia. Awor nan ta bai hopi den análisis di data, investigashonnan forensiko, konseho di maneho.  No ta wak solamente den pasado i hasi investigashon pero tambe nan ta kana sam sam ku gobièrnu pa ta un kritiko. Nan ta bisa e kosnan di forma profeshonal manera nan ta i ta keda den konkordansia ku e aparato gubernamental kon ta sigui. SOAB no ta un papagayo i no ta ripití loke un figura polítiko ke tende i esei e yuda traha e reputashon sólido ku SOAB tin. Loke nan bisa tin kredibilidat.

 

Kontrolá for di prinsipio

I den 25 aña por bisa ku nana krea e konsientisashon pa un mihó maneho. Antes nan ta bin dilanti ora ya e kosnan a pasa, pero awendia ta for di prinsipio ta konsultá ku e akountent di kiko e ta pensa. Esaki pa evitá ku ta bisa na final ku e kos no ta bon. I p’esei SOAB a adaptá su sistema di traha tambe. Nan ta kontrolá kontinuamente i ke yega na un ‘continues audit’ pa kada kos ku ta kana ta keda kontrolá i asina si algu no bai bon por korigié mesora. SOAB ta keda envolví mas tantu den maneho pa yuda pensa den ki direkshon ke bai. Por ehèmpel Geomaly Martis a menshoná asuntu di problemátika di kas na Kòrsou, desaroyo di haf, desaroyo di Bullenbaai i esei ta duna nan di SOAB un ròl mas amplio. Tur minister no ta meskos ku nan ta keda envolví manera e ministernan kuminsá traha.

 

No tin koló polítiko

SOAB no por tin koló polítiko, Nan mester por traha ku tur polítiko/minister ku sinta. Si bo no por traha ku nan anto nan mester saka konklushon. Or diferensia di vishon pero ta nan tin di ahustá nan mes pa por duna e servisio. I den e sentido ei nan a traha ku tur koalishon i tur minister. Nan ta sali i bisa ku nan tei pa yuda. Esaki ta un di e aspektonan ku a yuda e organisashon tei ainda i a sigui krese. Na momentu ku bo tin un koló polítiko bo lo no tei si esun di bo no tei mas.  E organisashon aki ta independiente, profeshonal i ta wak e echonan. I esei ta e parti fuerte di SOAB. Nan tei pa gobernashon. I tur e trahadónan di SOAB sa ku aki ta trata di e kalidat di trabou i ser neutral. Nan trabou ta mara den lei. I ounke ta un derechi di kada hende pa ta riba un lista pero ku e trabou na SOAB e no ta bai. I esei ta un punto ku e pone pa e personal.

 

Selebrá ku komunidat

Dia 3 di òktober SOAB ta kumpli 25 aña i Geomaly Martis tambe ta kumpli 25 aña na SOAB. El a splika ku nan a sinta pensa kiko pa hasi i fiesta sigur nan no ke mirando e situashon ku pais ta aden. Nan ke hasi algu ku komunidat ta benefisiá di dje. Un proyekto ku nan tin kla kaba ta ku nan ke pone mas i mas nan konosementu pa komunidat. Por ehèmpel den pasado nan a duna entrenamentu kon pa atendé ku presupuesto i kuenta anual. Tin hopi boluntario ta drenta e mundu ei pero no sa kon ta atendé ku sèn.   Nan ke hasi un siklo di entrenamentu pa duna mas konosementu i esaki den nan mes tempu i ora i kompletamente grátis. Otro parti di nan selebrashon ta envolví den barionan pa traha presupuesto i kon dil ku sèn. Esei ta un di e trayektonan ku SOAB ta hasi aki na Kòrsou i na St. Maarten. Mayoria kos ta kaba na finansa i si bo por dominá esei bon, bo ta evitá hopi doló di kabes, segun Geomaly Martis.

Otro proyekto ku SOAB ta trahando ariba ta ku nan ke hasi un trayekto di teknologia di informashon pa hóbennan. Prinsipalmente na Kòrsou por mira ku hopi hende ta pèrdè trabou pasobra e trabou ta stòp di eksistí. E ta rekerí tambe otro tipo di hende. Tin trabou ta disparsé pero tin trabou nobo ta bin i p’esei nan ke duna un aporte pa  envolví hóbennan i hasi nan mas interesá den esei. Te ainda tin hende ta bai hasi estudio di atministrashon i tin hende ainda ta kere den trabou di archivo, pero ya e trabounan ei ta kompleto digitalisá. I na su lugá tin otro trabounan ta surgi. I ta bon pa hóbennan komprondé esei i hasi e eskoho korekto. I SOAB ke trese e fasilidatnan pa e hóbennan komprondé i nan ke duna nan kontribushon den esei ku trainingnan. Esaki ta un kambio ku nan ke yuda kuné. Den kurso di lunanan ku ta bin nan lo anunsiá den ki forma i na ki momentu.

 

25 aña no ta wega

25 aña na un organisashon no ta wega si sinta reflehá. I ta konta tur kaminda den bo mes karera i bida. E ta bai pa e kaminda pa yega kaminda bo ke ta i nan di SOAB aki na Kòrsou ku situashonnan ku ta trese nan reto na dje, e ta kere ku mester tene na bista ku logra finalmente. Despues di 25 aña nan ta basta bon riba kaminda ounke tur kos por bira mihó i ta spera ku komunidat ta satisfecho ku e trabou di SOAB.

 

 

 

LAGA UN KOMENTARIO

Please enter your comment!
Please enter your name here