Sobrebibiente di Holokousto Margot Friedlaender, kende a muri e siman akí na edat di 103 aña.
BERLIN, Alemania.- E aleman Margot Friedländer, sobrebibiente di Holokousto i un dje testigunan mas destaká den horornan nazi, a muri ayera na edat di 103 aña den su siudat natal Berlin. E anunsio a keda hasí pa e fundashon ku ta karga su nòmber.
“Ku su morto, Alemania a pèrdè un bos importante den historia kontemporáneo”, segun e fundashon a bisa den un komunikado.
“For di momento di su regreso den su siudat natal, despues di seis dékada di eksilio na New York, e siudadano honorífiko aki di Berlin tabata komprometé di forma inkansabel ku e rekonsiliashon i e memoria”, segun el a agregá.
No mas ku ayera Friedlander mester a risibí un dje kondekorashonnan aleman di mas haltu for di mannan di presidente di Alemania, Frank-Walter Steinmeier. Pero e seremonia a keda kanselá pa problemanan di su salú.
“El a ofresé rekonsiliashon na nos pais, apesar di tur kos ku e alemannan a hasi tempu ku e tabata hóben. Nos no por ta mas agradesí na su persona pa e regalo akí”, segun e hefe di estado.
E señora akí di aspekto frágil i semper bistí di forma elegante -inkluso aparesé riba portada di Vogue den 2024- a regresá Berlin den 2003.
For di e tempu ei el a dediká su mes na papia ku hóbennan pa konta su historia i boga pa empatia enbes di odio.
Margot Bendheim durante di nazismo a pèrdè su mayornan i su ruman chikí, matá den kamponan di konsentrashon.
Den 1944 el a keda mandá e kampo di Theresienstadt, den e aktual Repúblika Checa, kaminda el a konosé su futuro kasá Adolf Friedländer. Tur dos a sobrebibí, nan a kasa i a bai biba na Merka
Den 2010 el a disidí pa establesé su mes di forma permanente den su siudat natal.
