WILLEMSTAD.- Dia promé di febrüari awor (2022) Optima Arbodienst ta kumpli 10 aña di eksistensia. Arthur Nivillac spesialista doktorá den servisio laboral a lanta e empresa/ instituto aki den un kamber na su kas i awe e ta un establesimentu ku ya a kambia 2 bia kaba di lokalidat, situashon den Metselaarweg 2 i ku 17 empleado. Papiando di 10 aña di Optima Arbodienst ta yena Arthur di orguyo pasobra ta su soño ku a bira realidat.
“Sigur sigur mi ta orguyoso pasobra e reto ku mi a tuma no tabata unu fásil. Outomátikamente mi tabata na otro Arbodienst i mirando ku mi vishon a kambia despues ku mi a bin for di Hulanda, e metodologia ku mi kier a traha kuné ku ta esun di e mentalidat, dil ku e komportashon, e aktitut di nos trahadónan i e método di mobilidat (methodiek mobiliteits) manera nos ta yam’e, e otro Arbodienst no tabata duna mi e espasio ei. I komo tal mi a tuma e desishon di sali afó i bai hasi mi soño realidat”.
Ora ku bo tuma un desishon asina pa sali, niun hende ta enkurashá bu, pasobra nan ta bisa ku tempu ta malu, bo ta ganando bo sèn, bo tin seguridat di trabou kaba i kiko bo tei tuma e rísiko. Pero e pashon ku tabata biba den Arthur Nivillac a pone ku el a bai e reto. El a tuma su retiro i a kuminsá 10 aña pasa. “No tabata fásil pasobra Kòrsou tabata konosé un Arbodienst, kiermen tur hende tabata papia di esun Arbodienst ei. Den e promé aña tabata hopi duru pa hendenan aseptá, nan no ke a aseptá mi, tur hende ta duda den mi kapasidat, tur hende ta haña ku mi no ta kumpli ku norma, tur hende ta haña esaki i esaya. Mi a haña mi asta ku kòntròl di inspekshon, pasobra mi lo tabata hasi algu ilegal. Pero e mesun hendenan ei, tabata apresiá mi, tabata kargá mi na e otro Arbodienst, pero pasobra mi a lanta mi mes Arbodienst, e kos no ta bon mas. Pero awor aki mi ta sintá aki i nos ta selebrá mi di 10 aña. Mi ta hopi orguyoso i hopi kontentu, nos a logra”, Arthur a bisa EXTRA.
Kiko ta e trabounan di Optima Arbodienst?
Awor aki ta un aña kaba ku Optima ta un ‘holding’, Optima BV. E ta konsistí di 4 pilar importante ku nan ta para pe.
E kuater pilarnan aki ta Optima Arbodienst, Optima Arboacademy, Optima Bureau Rechtshulp Arbeid i Optima Absentium ku ta un programa di aplikashon di apsentismo.
Un trahadó satisfecho i motivá ta produsí
Optima Arbodienst ta esun ku Arthur Nivillac a kuminsá 10 aña pasa kuné. Su filosofia 10 aña pasá ta e kier a hasi boka di trabou mas sano i mas seif. Nos boka di trabou no ta sano ni ta seif i kiko un Arbodienst ta para pe, e ta para pa lugánan di trabou sigur i salú pa asina e trahadó por ta salú.
Saka tur loke no ta sano den un organisashon ku por hasi un trahadó malu, pa por tene e trahadó malu ‘op de werkplek’. Arbodienst no ta nifiká kòntròl. Arbodienst no ta nifiká ku bo ta bai dòkter pasobra bo ta ‘verzuim’. Arbodienst ta nifiká ku ora un hende ta ousente, tin un pakiko. Buska pa sa kiko ta e pakiko, e ora ei bo ta yuda e trahadó outomátikamente ora bo sa kiko ta e pakiko i bo yuda, bo a baha e apsentismo. “Ami ku mi 35 aña den e sektor aki sa ku nos poblashon no ta malu, 20% ta médikamente malu, sobra porsentahe ta malu dor di e trabou ku ta hasié malu, e situashon laboral ta hasié malu, e manera ku bo ta trata mi ta hasi mi malu, e relashonnan ku trahadó i doño di trabou ta hasi mi malu, e kompensashon ta hasi mi malu. I bo tin e porsentahe ku ta bida privá ta hasi mi malu”.
Mester siña ku ora ta papia di un Arbodienst ki ora ta ta papia di apsentismo pa malesa i ki ora ta papia di apsentismo pa e trabou òf pa bida privá. I ora komprondé e trahadó mas mihó, e ora ei por saka man mas mihó pa e trahadó i por yud’e mas mihó.
E pensamentu di un Arbodienst ta pasobra bo ta malu bo tin di bai dòkter Nivillac ta kere tin di kuminsá kita esei for di mesa. Serka nan na Optima, bo no ta wak e dòkter (bedrijfarts) mes. E dòkter ei ta bin dilanti ora tin algu médiko. Ora e petishon drenta e ta bai serka e ‘case managernan’ i nan ta hasi nan análisis i ora e sa ku por ehèmpel ku ta ‘ergonoom’ bo mester pasobra bo stul òf mesa no ta bon, e ‘ergonoom’ ta bai hasi un inspekshon na e trabou i si e topa algu médiko òf mester di informashon médiko, e ora ei ta papia ku e dòkter, pa e dun’é informashon.
Si ta problema matrimonial tin i e trahadó ta keda kas no tin mester bai un dòkter pero un trahadó sosial òf sikólogo. ‘Asina nos komo Optima ta traha. No ta manera bo tin doló di barika bo tin di bai un ‘bedrijfsarts’ pasobra e no por yuda bu ku tur kos. E ‘bedrijfsarts’ no ta dios, nos ta hasi e disiplinanan den ARBO. Esei ta e manera kos nos ta yena nos Arbodienst. Un arbodienst bo mester purba di tene e trahadó satisfecho, motivá den su boka di trabou i outomátikamente e ta produsí pa bo i e ora ei tin ménos apsentismo.
Arbo Academy pa e doño di trabou i trahadó sa su derechi
Arthur Nivillac a sigui splika di e siguiente pia di Optima ku ta e Arbo Academy. El a splika ku ora e drenta den empresanan, tur hende nan boka ta yen di ARBO, pero nan no ta komprondé kiko ta ARBO. Nan no ta papia e idioma di ARBO pa tur e añanan ku nos tin un Arbodienst na Kòrsou. no a eduká nos pueblo kiko ta Arbodienst.
Optima si a haña nesesario ku tur empresa ku ta traha ku nan, mester sa kiko ta ARBO. ‘Sino e ora ei bo no por papia e lenga meskos ku nos ta papi’e i bo no ta komprondé tampoko kiko nos ta purba di splika bu. Esei nos a hasi. Pero masha lihé Kòrsou tabatin e nesesidat tambe di wòrdu eduká. I awor aki nos ta eduká Kòrsou, nos ta edukando St Maarten. Boneiru, Aruba i Sürnam. Nos ta na tur e islanan ei. Edukando, informando, guiando pa hasi nos pueblo mas konsiente di ARBO”, Nivillac a enfatisá. Mas konsiente hasi pueblo, mas mihó, mas sano lugánan di trabou lo bira.
Maltrato laboral di dunadó di trabou i trahadó
Na momentu ku Optima tabata hasiendo nos hendenan konsiente di ARBO, nan a ripara ku tin maltrato laboral di tur dos banda. Di dunadó di trabou i di trahadó, pero atrobe, e dos partidonan no sa nan derechi hurídiko i p’esei a lanta Bureau Rechtshulp arbeid.
Bureau Rechtshulp arbeid ta e di tres pia di Optima i el a lanta huntu ku 2 abogado pa ora tin pregunta, ke konseho, ke wòrdu guia hurídikamente, ta bin serka nan i Optima ta wak e parti labor i si tin algu hurídiko mesora ta envolví e abogadonan. I si tin di guia bu te korte, nan ta hasié tambe. Hopi bia bo ta aserka e dunadó di trabou i pidié pa yuda i ban traha huntu pa e kos no yega korte, si e dunadó di trabou neglish’é, outomátikamente nan lo topa otro den korte. Na otro banda si e dunadó di trabou no sa kon tin di kita e trahadó pasobra e trahadó ta beisig ta desfunshoná i tin otro trabou, Optima ta guia e dunadó di trabou tambe kon e tin di hèndel af ku e trahadó aki. Arthur a enfatisá ku e ta un balansa; nan no ta laga niun di dos partido kai. Esei ta importante den ARBO. ARBO ta nifiká un balansa simétriko. Esei ta nifiká ku e dunadó di trabou tin mesun balor ku e trahadó i p’esei un di nan filosofianan importante ta ‘eigen regie model’. Bo mes ta doño di bo mes kurpa i e dunadó di trabou tambe. ‘Nos no ta tuma nada over pero nos ta hasié huntu. Pasobra ARBO ta nifiká hasié huntu. I ta íntegro i transparente i no skonde i bisa a òf b, tur dos partido tin derechi. Nos ‘beoordelingnan’ kua ku nan ta, bo tin derechi di haña un kopia pasobra e ta bai tokante di abo. No ta pasobra ta e ‘opdrachtgever’ a duna e ‘opdracht’ abo no mag di sa. E ta bai riba abo i bo tambe tin mag di hañ’e”.
Komprondé apsentismo
Optima Absentium ta e di kuater pia di Optima BV. Segun Nivillac a splika, nan a ripara ku tin hopi empresa kaminda HR nan ta skibi apsentismo ainda na man. O di ‘ongeoorloofd’, V di ‘verzuim’, Z di ‘ziek’ i nan tin e nèchi skibi pero no por interpret’é. Nan no por komprondé. I p’esei Optima huntu ku nan partnernan na Hulanda i Kòrsou a bin ku nan propio programa di aplikashon di apsentismo i dosié médiko. Ta hinka tur informashon den e programa i e ta saka e reportahe, na sifra i porsentahe presis kiko ta pasando, e frekuensia di apsentismo, kiko ta ‘rood, zwart i grijs’, e patronchinan, ‘arbeids verzuim’, ‘ziekte verzuim’ i un kos importante tin bèk òp di spesialistanan di Optima. Ora no ta komprondé e programa òf ke konseho, Optima ta asistí den esei.
