BAUCHI , NIGERIA, AP.- Sòldatnan nigeriano a frustra atentadonan ku tres muhé mester a kometé di parti e grupo ekstremista Boko Haram. Dos di nan a wòrdu tirá miéntras e tabata purba di eksplotá su aparatonan serka di personanan ku a hui di nan kas pa kousa di e lucha, segun ehérsito. Algun di eksplosivo di e agresornan a eksplotá asta despues ku e muhénan a keda tirá, miéntras e terser atakante e eksplotá su bòm den un zona diferente kaminda niun hende no a resultá heridá.
Dos sivil a resultá heridá den e atakenan frustrá djamars mainta pafó di e pueblo Monguno, na nortost di Nigeria, kaminda Boko Haram ta aktivo. Asina un deklarashon di koronèl Sani Kukasheka Usman a indiká.
Den un otro echo di violensia, ehérsito nigeriano a bisa ku a mata kuater miembro di Boko Haram djamars mainta serka di e region Kukawa, na nortost di e pais.
Na sùit di e pais, supuesto milisianonan di e grupo vengadónan di Delta di Niger a eksplotá dos oleodukto djaluna kual tabata pertenesé na e kompania petrolero estatal i di e kompania Chevron, ku sede na Merka, segun informashon di outoridatnan. E milisianonan na sùit di Delta di Niger a bisa ku ya a redusí e produkshon di petroli ku atakenan similar, bou di e argumento ku nan meresé mas parti di e rikesa di petroli.
Tambe nan a eksigí un referèndem pa pone fin na e federashon nigeriano. Tur e produkshon petrolero di Nigeria, kual ta sòru pa 70% di entrada di e gobièrnu federal, ta na Delta di Niger i na kostanan di e region na sùit. E industria a kontaminá hopi den region i a destruí komunidatnan ku ta dependé di peska i agrikultura.