WILLEMSTAD.- Solidaridat Sindikal ta spera pa un orario pa reuní awe ku promé minister Eugene Rhuggenaath riba e Plan di Kresementu i tambe medidanan ku lo drenta na vigor. Den e reunion Solidaridat Sindikal lo pone su puntonan i si gobièrnu no kita nan, por spera akshon djaluna awor, ta loke ku sr. Errol Cova di Solidaridat Sindikal a duna di konosé na EXTRA.
Ayera Solidaridat Sindikal forma pa 10 sindikato a tene un reunion general ku nan miembronan pero tambe siudadanonan ku ta kansa dje situashon i medidanan ku gobièrnu ke bin kuné.
Promé ku e reunion di ayera nochi, den kurso di dia Solidaridat Sindikal a reuní ku frakshon di PAR i Man na parlamentu. Segun sr. Cova, asina nan a reuní ku frakshonnan ku ta forma koalishon i oposishon, kaminda nan por a pone nan posishon riba mesa.
Pa loke ta trata e reunion ku a tuma lugá 7’or di ayera nochi na PWFC, sr. Cova a indiká ku tabatin hopi hende rabia.
“E hendenan ke pa nos bai papia ku promé minister Rhuggenaath, kaminda lo bisé ku mester kita e medidanan i mester duna sindikato partisipashon na formulá un plan di kresementu. No ta sigui ku esun ku a firma i tin aktualmente riba mesa. Si nos no logra nada serka promé minister Rhuggenaath pa djaluna nos tin derecho di kanta akshon”, segun Cova.
Ayera nochi mes Cova a yama promé minister, i e promé mandatario di pais a keda di yama sr. Cova awe pa un reunion.
Solidaridat Sindikal ke partisipashon real den kualke plan di kresementu ku tin. Pa Solidaridat e plan di “Groeistrategie” ku gobièrnu a firma ku Ulanda no tabatin partisipashon di sindikalismo, i otro organisashonnan manera di bario, i otro organisashonnan ku ta serka e pueblo. Nan ta deseá un plan stratégiko mas amplio.
“Groeistrategie” ta un plan di medida i no di kresementu di nos ekonomia. Nos a haña konseho i introdukshon di vários eksperto riba e “groeistrategie”, i p’esei nos ke sa kua ta e media i kon e medidanan ta yuda nos sali pa dilanti”.
Tambe Solidaridat Sindikal ta preokupá ku desempleo ku a krese.
Manera indiká ariba, e reunion a terminá i kaminda públiko a tuma desishon ku ta bai pidi un reunion ku promé minister i lo pone nan poseshon ku ta rechasá e forma kon a traha e “Groeistrategie” i pa nan haña partisipashon den esaki. Si no haña oido, djaluna próksimo Solidaridat Sindikal lo kanta akshon.
