WILLEMSTAD.- Sonesta International Hotels Corporation (Sonesta) ta anunsiá apertura awe, 1 di aprel 2026, di Sonesta Resort Curaçao. Un resort ku 196 kamber, situá na Jan Thiel.
“Apertura di e resort nobo aki di Sonesta Hotels Resorts & Cruises na Kòrsou ta reflehá e kompromiso grandi di Sonesta pa sigui ekspandé den Latinoamérika i Karibe,” asina Keith Pierce, Co-CEO di Sonesta, a bisa. “Nos ta entusiasmá ku nos presensia di e resort bunita aki i asina fortifiká nos portofolio i rekonosimentu di marka den un destinashon hopi deseá.”
Sonesta ta orguyoso di trese un otro propiedat na Karibe Hulandes, despues ku a operá hotèlnan na Aruba, Boneiru i Kòrsou den añanan nobenta, i atrobe na Kòrsou den 2015-2016.
“E resort, ku anteriormente tabata konosí komo Livingstone Jan Thiel Beach Resort, ta ofresé diferente tipo di akomodashon manera villa, apartamento i kamber tradishonal,” asina Atilay Uslu, fundador i CEO di Corendon Hotels & Resorts, ta bisa. “Nos vishon ta kla: krea un lugá kaminda tur huésped por haña e balansa ideal entre divershon i relakshon. Situá den un di e bario mas ikóniko di Kòrsou, rondó di pal’i koko, un brisa tropikal i solo durante henter aña. E hotèl aki ta kaptura e espíritu berdadero di Kòrsou. Komo CEO, mi ta orguyoso di e dedikashon di nos tim pa ofresé eksperensianan memorabel i hospitalidat ekselente, pa asina hasi kada estadia tan spesial manera e destinashon mes.”
Sonesta Resort Livingstone Curaçao ta ofresé un pisina grandi den aire liber, un sentro di buseo PADI di 5 strea i akseso direktamente na Jan Thiel Beach. E resort tin un restorant i bar nobo inspirá dor di Italia, un gimnasio i servisio di spa, tur situá den un ambiente bunita di resort. Huéspetnan por gana i usa puntonan komo miembronan di e programa di ‘loyalidat’ di Sonesta Travel Pass.
Sonesta Hotels, Resorts & Cruises® ta pone enfoke riba bienestar i salú, stimulá konekshon real entre empleado i huéspet i mantené harmonia entre kada hotèl i su bisindario. Huéspetnan por deskonektá den kambernan elegante inspirá pa e destinashon i disfrutá di hopi fasilidatnan tantu aden komo pafó i espasionan apto pa trabou.
